L-akkwist il-ġdid ta’ Barcelona Pierre Emerick-Aubameyang stqarr li l-unika problema li kellu mal-club ta’ Arsenal kienet mal-coach Mikel Arteta. Fl-ewwel kummenti tiegħu wara t-trasferiment Aubameyang qal li qatt li ma ried jagħmel xejn ħażin filwaqt li ma kienx kuntent bil-mod kif kien trattat mill-coach Spanjol.
Ir-relazzjoni bejn Arteta u Aubameyang jidher li ddeterjorat fl-aħħar xhur wara li Aubameyang irritorna tard għat-taħriġ minn vjaġġ biex jġib lill-ommu, li kienet marida, f’Londra. Wara dan l-inċident Arteta eżilja lill-captain tal-Gabon mill-iskwadra fejn ilu mis-6 ta’ Diċembru ma jilgħab għal Gunners, bl-aħħar ħarġa tiegħu tkun fit-telfa ta’ 2-1 kontra Everton.
Intant, Aubameyang iffirma kuntratt ta’ 3 snin u nofs mal-club minn Catalunya, bi klawżola ta’ £83.4m. Għal Arsenal Aubameyang skorja 92 gowl f’163 partita.
