Colin Schembri
Finali MBA Shield Nisa
Hibernians 57
Caffè Moak Luxol 43
(16-5)(19-12)(9-14)(13-12)
Hibernians: E. Farrugia, Y. Bonett 7, A. Van Vliet 5, J. Abela 6, C. Camilleri, K. Jenkins 25, N. Farrugia, K. Caruana 14, K. Conti, K. Fenech, J. Dabic.
Caffè Moak Luxol: L. Fenech Pace 9, V. Selvaggi, S. Pace 12, M. Mercieca 2, F. Camilleri, H. Galea, P. Marcal 4, A. Borg, P. Ellul 6, M. Camilleri, J. Diaby 10.
Referees: Florentina Ciurariu, Ionut Ciurariu, Zvezdan Dobrosaviljevic.
Hibernians rebħu l-ewwel unur tal-istaġun meta għelbu lil Cafffè Moak Luxol 57-43 fil-finali tal-MBA Shield biex rebħu dan l-unur għall-għaxar darba fl-istorja tagħhom. Hibs kienu fil-kontroll tul il-partita kollha bl-eċċezzjoni tal-ftuħ tat-tielet sessjoni fejn sofrew tentattiv ta’ rimonta minn Luxol. Fil-fatt sa’ mill-ewwel sessjoni Hibs fetħu tajjeb u ħallew lil Luxol fuq ħames punti biss. Wara basket inizzjali minn Josephine Diaby, Hibs kellhom sitt punti minn Kenyotta Jenkins u Kirsty Caruana. Hawn waslu l-aħħar punti ta’ Luxol minn trippla ta’ Sarah Pace bil-Hibs ikomplu b’run ta’ 10-0 fejn fost l-oħrajn kellhom it-trippli minn Jasmine Abela għal skor ta’ 16-5. Fit-tieni taqsima, l-andament tal-partita baqa’ l-istess speċjalment wara aktar trippli minn Hibs minn Ylenia Bonett u Kirsty Caruana. Magħhom kien hemm ukoll il-punti minn Jenkins li kompliet tkabbar il-vantaġġ tal-Pawlisti. Għal Luxol il-punti ġew bil-mod, l-ewwel minn Diaby u aktar ‘quddiem minn Lisa Fenech Pace u Mandi Mercieca però Hibs daħlu jistrieħu 35-17 minn fuq.
Wara l-intervall assistejna għall-aħjar mument ta’ Luxol fil-partita fejn immexxija minn Sarah Pace għamlu run ta’ 10-0 li rat ukoll basket ta’ Paula Ellul biex naqqsu d-distakk għal 8 punti 27-35. Finalment Hibs irnexxielhom iwaqqfulhom ir-run bi trippla ta’ Caruana u baskets minn Jenkins u Ashleigh Van Vliet għal skor ta’ 44-31. Fl-aħħar taqsima, Luxol fetħu b’basket ta’ Diaby u trippla ta’ Fenech Pace qabel ma Hibs reġgħu għamlu sitt punti oħra mingħajr risposta. Luxol reġgħu wieġbu permezz ta’ Palmira Marcal u Pace però kienu Hibs li għamlu l-aħħar punti tal-partita biex finalment ħarġu rebbieħa 57-43 u ċċelebraw ir-rebħ tal-ewwel unur għal dan l-istaġun. Fit tmiem il-partita, l-President tal-MBA Paul Sultana ppreżenta t-trofew lil captain ta’ Hibs Ashleigh Van Vliet.
