Pietà Hotspurs iżommu l-pass ma’ ta’ quddiem

Pietà Hotspurs rebħu l-konfront kontra Mġarr United bl-iskor ta’ 2-0, biż-żewġ gowls jaslu fit-tieni taqsima tal-logħba miż-żewġ players Ġappuniżi Teppei u Morita. Minn naħa tagħhom Mġarr sofrew it-tieni telfa konsekuttiva fil-ġlieda tagħhom biex isavaw posthom fiċ-Challenge League. Kien Teppei li skurja l-gowl tal-vantaġġ fis-57 minuta tal-logħba biex ta vantaġġ lit-tim immexxi minn Paul Gatt. Pietà Hotspurs spiċċaw jilgħabu b’għaxar players meta Dylan Grima kien muri t-tieni karta safra f’temp ta’ tliet minuti, biex lagħbu l-aħħar għoxrin minuta tal-partita bi player inqas. Fl-aħħar ħin tal-partita Mġarr ippruvaw iżidu l-isforzi tagħhom biex jakkwistaw il-gowl tad-draw. Fit-92 minuta minn azzjoni ta’ corner għal Mġarr, Pietà ħadu l-ballun u b’ġirja tajba ta’ Teppei li ġera tliet kwarti ta’ grawnd, qassam lil Morita li għeleb lil Dimech u assigura t-tliet punti.

Żejtun C jidħlu fit-taqtiegħa għall-promozzjoni

Żejtun Corinthians rebħu l-konfort dirett fin-naħa ta’ fuq tal-klassifika biex issa jinsabu biss erba’ punti taħt l-istess Naxxar Lions. Għal Naxxar din kienet it-tieni telfa konsekuttiva wara li l-ġimgħa ta’ qabel tilfu l-konfront kontra San Ġwann. Żejtun ħarġu mill-ewwel fuq l-offensiva u marru fil-vantaġġ wara ħames minuti permezz ta’ Renan Sgaria Farias. Fl-54 minuta Naxxar ingħataw penalty u mill-ħdax-il metru Gilberto Carrara Martins Leite għeleb lil Christian Cassar għal dro ta’ 1-1. Seba’ minuti minn tmiem il-partita Żejtun skurjaw il-gowl tar-rebħa meta Claudio Henrique Da Silva Barbosa għeleb lil Omar Borg. Żejtun għarfu jżommu l-vantaġġ biex saħħew posthom fil-klassifika u mill-ġdid daħlu fit-taqtiegħa għall-promozzjoni meta baqa’ ħames logħbiet għal tmiem l-istaġun. F’logħba oħra minn grupp A San Ġwann dawru telfa f’rebħa kontra Vittoriosa Stars biex komplew jitbiegħdu miż-żona l-ħamra. Vittoriosa fetħu vataġġ doppju permezz ta’ żewġ penalites skurjati minn Tejumola Ebenezer Ayorinde u Freud Gnindokponou fid-19 u fit-23 minuta rispettivament. Fl-aħħar kwarta tal-partita San Ġwann skurjaw tliet darbiet biex akkwistaw it-tielet rebħa fl-aħħar erba’ logħbiet. Amarildo Leirosa Junior skurja doppjetta personali fil-75 u fil-81 minuta filwaqt li Alexandre Floriano Lopes skurja l-gowl tar-rebħa fil-91 minuta.