Il-Qorti ddikjarat li jeżistu biżżejjed provi l-eks Kummissarju tal-UE John Dalli jitqiegħed taħt att ta’ akkuża, hekk kif kompliet il-kumpilazzjoni tal-provi kontrih. Aktar kmieni dan ix-xahar, Dalli kien akkużat bi ‘trading in influence’ fuq allegat tixħim ta’ €60 miljun mitlub mill-eks assistent tiegħu, Silvio Zammit, biex jgħin biex titneħħa projbizzjoni madwar l-UE fuq it-tabakk tal-isnus.
Kienet il-Maġistrat Caroline Farrugia Frendo li ddeċidiet li jeżistu biżżejjed provi prima facie biex Dalli titpoġġa taħt att ta’ akkuża. “Kien il-Kummissarju John Rizzo li bagħat għalija f’Ottubru tal-2012 fejn iddiskutejna flimkien mal-Avukat Ġenerali Peter Grech rapport, fejn skoprejna li minn investigazzjonijiet li saru kien hemm korruzzjoni u ‘trading in influence’ fil-konfront ta’ Silvio Zammit u John Dalli. Madankollu stajna biss nipproċedu biss kontra Zammit għax fil-konfront ta’ John Dalli kien għad fadal aktar investigazzjonijiet xi jsiru”.
Dan ħareġ mix-xhieda tal-eks Assistent Kummissarju Michael Cassar meta kompla jinstema’ l-każ fil-konfront ta’ John Dalli. L-eks Kummissarju Ewropew kien tressaq il-Qorti b’ċitazzjoni akkużat minħabba l-allegazzjonijiet ta’ tixħim li wasslet għar-riżenja tiegħu mill-Kummissjoni fl-2012.
Fis-26 ta’ Settembru 2013 l-eks Kummissarju tal-Pulizija John Rizzo li kien tneħħa mill-kariga mill-Gvern Laburista fl-istess sena kien qal fil-Qorti li ried iressaq quddiem il-Qorti lil John Dalli. Huwa kien qal dan waqt xhieda li kien qed jagħti fil-każ kontra n-negozjant Silvio Zammit, li sfortunament miet ftit tal-jiem ilu fl-età ta 57 sena.
Fix-xhieda tiegħu Michael Cassar qal li ra rapport fuq suspett ta’ tixħim u li ġew arrestati u mitkellma diversi persuni relatati mal-każ, Dawn ġew rikordjati fuq tapes. Hawn Il-prosekuzzjoni esebixxit it-tapes li kienu siġillati f’envelope. Cassar jikkonferma li l-firma tiegħu tinsab fuq l-envelope.
Qal li fl-2011 Silvio Zammit iltaqa’ ma’ Dalli u ma’ Thomas Hammergren. F’Novembru wkoll tal-istess sena, Silvio Zammit, Hammergren u Mario Bonnici ltaqgħu fi Stokkolma. Johann Gabrielsson kien tkellem ma’ Gail Kimberly li kienet avukat biex jirranġaw laqgħa ma’ Dalli.
Dalli, Zammit u Kimberly kellhom jiltaqgħu fis-6 ta’ Frar 2012 imma minflok iltaqgħu fl-10 ta’ Frar peress li Dalli ma kienx f’Malta. Kompla jgħid li Kimberly bagħtu numru sostanzjali ta’ emails lil Zammit. F’Mejju tal-2012 Swedish Match għmalet rapport li wassal għal inestigazzjoni.
Tenna li kien Silvio Zammit li saħaq ma’ Gayle Kimberley, avukat li tispeċjalizza fil-liġi Ewropea, li l-ban fuq snus tista’ tinbidel, iżda hemm prezz ta’ sitt zeros, jiġifieri minn miljun ‘l fuq. Huwa qal li Kimberley iltaqgħet ma’ Silvio Zammit għax laqqagħha miegħu dak li kien is-sieħeb tagħha Josef Galea.
Mill-investigazzjonijiet irriżulta li hija tħallset €5,000 biex tlaqqa’ lil rappreżentant tal-kumpanija Swedish Match li tipproduċi s-snus ma’ Zammit, liema talba ntlaqgħet. Cassar tenna li saret laqgħa ma’ John Dalli fl-uffiċċju tiegħu f’Portomaso ma’ Kimberley u Zammit. Wara dan, Giovanni Kessler qal lil Kimberly li kien se jiġi investigat il-każ tas-snus fuq suspetti ta’ tixħim.
Cassar saħaq li wara’laqgħa f’Malta, Silvio Zammit kien qal lir-rappreżentant ta’ Swedish Match, Johan Gabrielsson, li jistgħu jinbidlu l-affarijiet jekk titħallas is-somma ta’ €60 miljun. Gabrielsson kien qallu li t-talba kienet kontra l-policy u l-etika tal-kumpanija, u meta rrefera l-każ lid-diriġenti tal-kumpanija, qalulu biex jinqata’ kull kuntatt ma’ Silvio Zammit.
Ix-xhud qal li aktar tard daħlu l-OLAF biex jinvestigaw, b’Kimberley kienet interrogata mir-rappreżentanti tal-OLAF meta marru jsegwuha l-Portugall.
Xehed ukoll l-eks Deputat Kummissarju tal-Pulizija Joseph Cachia li qal li l-Kummissarju Rizzo talbu jgħinu fl-investigazzjonijiet dwar każ ta’ tixħim kontra d-direttiva Ewropea. Qal li anke tkellem ma’ John Dalli, li rrifjuta li jkollu avukat waqt l-interrogazzjoni.
Dalli kien ġie investigat wara li r-rapport tal-Uffiċċju Ewropew ta’ Kontra l-Frodi, l-OLAF, li kien indika li l-eks Kummissarju Ewropew kien jaf bl-allegat każ ta’ tixħim biex tkun tista’ tgħaddi direttiva dwar it-tabakk Snus. Il-prosekuzzjoni qed titmexxa mis-Supretendent James Grech, waqt li l-Avukat Antoine Agius Bonnici qed jidher għall-Uffiċċju tal-Avukat Ġenerali, u l-Avukati Stephen Tonna Lowell u Stefano Filletti qed jidhru għad-difiża. Il-kawża ġiet differità għat-30 ta’ Marzu li ġej fl-10.00am.
