“Il-pożizzjoni tiegħi hija waħda ċara… Għandna bżonn Gvern ġdid Nazzjonalista sabiex tkun salvagwardjata d-demokrazija ta’ pajjiżna u jerġa’ jkollna ekonomija b’saħħitha, insalvaw ir-reputazzjoni ta’ pajjiżna u nibdew proċess ta’ bidla fis-soċjeta Maltija”.
Hekk kiteb l-eks delegat tal-Partit Laburista Mark Camilleri fil-blog tiegħu fejn żied jgħid li taħt it-tmexxija ta’ Robert Abela ma nistgħux nirranġaw ir-reputazzjoni ħażina li għandu pajjiżna…. anżi jekk nibqgħu taħtu, se nispiċċaw insiru iktar irrelevanti globalment u ma nattirawx investiment ġdid lejn pajjiżna.
Mark Camilleri kiteb li f’dawn l-aħħar sentejn taħt it-tmexxija ta’ Robert Abela pajjiżna ma għamel ebda progress fejn tidħol is-saltna tad-dritt. Bil-kuntratti kollha korrotti li saru taħt it-tmexxija tal-eks Prim Ministru Joseph Muscat, fosthom tal-Vitals u Electrogas… kollha għadhom hemm.
Mark Camilleri qal li pajjiżna għandu bżonn jitneħħa minn fuq il-lista l-griża mill-iktar fiss. Semma kif taħt Gvernijiet Nazzjonalista Malta kienet tgawdi suċċess fil-qasam tal-gaming, iżda f’dawn l-aħħar disa’ snin taħt Gvern Laburista ma kien hemm ebda investiment ġdid f’dan is-settur.
