Fil-partita prinċipali tal-ewwel leg tal-fażi tal-aħħar sittax tal-UEFA Champions League, Atletico Madrid u Man Utd temmew fi draw ta’ 1-1. Kienu Atletico Madrid li fetħu l-iskor mas-7 minuta meta minn cross ta’ Renan Lodi kien Joao Felix li bir-ras tefa’ fix-xibka għal 1-0. Minkejja dan Man Utd kellhom jistennew sat-80 minuta għal gowl tad-draw meta minn pass ta’ Bruno Fernandes kien iż-żagħżugħ tal-mument Anthony Elanga li b’kalma liema bħala xeħet wara Jan Oblak għal skor finali ta’ 1-1.
Fil-partita l-oħra Benfica u Ajax temmew fi draw ta’ 2-2. Kienu Ajax li marru fil-vantaġġ fit-18-il minuta meta minn pass ta’ Noussair Mazraoui kien Dusan Tadic li xeħet fix-xibka għal 1-0. Benfica kisbu l-gowl tad-draw fis-26 minuta meta Sebastian Haller tefa’ fix-xibka tiegħu stess għal 1-1. Madanakollu tliet minuti kien l-istess Haller li din id-darba ikkonkluda fin-naħa t-tajba u tefa’ lil Ajax fil-vantaġġ għat-tieni darba. Iżda Benfica reġgħu kisbu d-draw fit-72 minuta meta kien Roman Yaremchuk li kkonkluda fix-xibka għal skor finali ta’ 2-2.
UEFA CHAMPIONS LEAGUE
Ilbieraħ: Chelsea v Lille 2-0, Villareal v Juventus 1-1 Illum: A.Madrid v Man Utd 1-1, Benfica v Ajax 2-2
