Mistoqsi dwar Christian Borg. Abela ma jweġibx.
Mistoqsi dwar Rosianne Cutajar. Spiċċa jfarfar.
Mistoqsi dwar Konrad Mizzi. Għażel illi jinħeba.
Ma jwegibx lanqas id-domandi dwar il-bejgh tal-passaporti ghar-Russi. Ma jweġibx dwar Transport Malta. Filwaqt li anke dwar id-dibattitu ma’ Bernard Grech fuq pjattaforma indipendenti…il-Prim Ministru jibqa’ jaħrab.
Hija din l-attitudni li ddominat konferenza tal-aħbarijiet fir-Rialto, fejn Abela tista tgħid ma weġibx domanda waħda li hi waħda magħmula minn Net News – partikolarment rigward iż-żagħżugħ Christian Borg, li allegatament huwa involut fi kriminalità organizzata u li li tressaq il-Qorti b’rabta ma’ ħtif ta’ persuna.
Mat-Times of Malta, Robert Abela kien ammetta li għamel biċċa business miegħu fuq proprjetà… iżda għal darb’oħra ħarab milli jammetta kemm għamel profitt.
Diversi kmamar tal-aħbarijiet preżenti staqsewh ukoll rigward it-taħdidiet bejn il-Gvern tal-Labour u Steward Healthcare, b’Robert Abela iwieġeb li m’hemm ebda taħdidiet għaddejjin bħalissa. Mistoqsi minn Net News għaliex ma jridx jieħu deċiżjoni dwar dan id-deal skandaluż…Abela kkonferma se jibqa’ jkaxkar saqajh u jistenna l-eżitu tal-proċeduri li għaddejin fil-Qorti.
Mistoqsi wkoll jekk hux lest jerġa’ jpoġġi fil-Kabinett tiegħu lil Rosianne Cutajar kemm-il darba jiġu eletti fil-Gvern – huwa insista li ħabibtu diġà refgħet responsabbiltà politika…iżda ħarab milli jwieġeb.
U mistoqsi jekk hux lest jerġa’ jilqa’ fi ħdanu lil Konrad Mizzi għal darb’oħra kien evażiv u qal sempliċiment li Mizzi mhux kandidat tal-Labour.
