Dmitry Peskov, il-kelliem għall-Kremlin, qal li r-Russja tinsab lesta għal taħditiet mal-Ukrajna u meta ‘kull djalogu potenzjali’ irid isir f’Minsk, il-kapitali tal-Belarus.
Fl-istess ħin, ir-Russja insistiet biex it-taħditiet jinvolvu ‘dikjarazzjoni għal status newtrali mill-Ukrajna’. Dan waqt li l-President Zelensky sejjaħ għal taħditiet mal-President Russu Vladimir Putin — bit-talba tiegħu ma tkunx aċċettata. Il-Ministru Russu għall-Affarijiet Barranin, Sergei Lavrov, qal ukoll li ma jistgħu jsiru l-ebda taħditiet ma’ Kiev qabel l-Armata tal-Ukrajna ċċedi l-armi.
Fl-aħħar sigħat, il-President Ukren kellu taħditiet mal-Prim Ministru Britanniku Boris Johnson u mexxejja oħra tal-Punent, Dan meta l-Ewropa hi mimlija bl-ammirazzjoni għall-qlubija tad-difensuri Ukreni f’din is-siegħa ta’ prova. Zelensky talab biex iċ-ċittadini fl-Ewropa jipprotestaw ‘dwar il-massakru tan-nies innoċenti fl-Ukrajna’ u biex huma jitolbu lill-Gvernijiet tal-Punent biex ‘jintervjenu’ bil-għan li jwaqqfu l-aggressjoni tar-Russja.
