L-Armata tar-Russja, fl-aħħar sigħat, intensifikat l-offensiva fuq iz-zoni urbani u strateġiċi tal-kapitali tal-Ukrajna u meta spikkaw l-isparaturi tal-missili lejn iz-zoni prinċipali ta’ Kiev fejn qed jgħixu numru sinifikanti ta’ ċivili.
Madankollu – u minkejja li l-ġlied bejn id-difensuri Ukreni u r-Russi baqa’ għaddej ukoll fl-inħawi ta’ Odessa u Kharkiv – l-Ukreni jidhru li qed jirreżistu b’mod effettiv għall-invażjoni tal-militar Russu, fost it-telf ta’ ħajja qawwija fuq kull naħa.
Sadanittant, il-pjanI tar-Russja biex tokkupa ‘malajr’ lil Kiev u l-ibliet prinċipali kollha tal-Ukrajna jidhru li ħabbtu ma mhux ftit tal-intoppi, bit-truppi ta’ Moska qegħdin iħallsu prezz qares għal kull nitfa art li jieħdu. Fl-istess ħin, il-missili tar-Russi qegħdin jolqtu, fost oħrajn, il-blokki residenzjali fil-kapitali Ukrena.
Fl-aħħar sigħat, il-qawwiet Russi kienu qed jagħmlu minn kollox biex jegħlbu d-difiżi fi Kiev u jaslu saċ-ċentru tal-kapitali Ukrena, iżda huma baqgħu jiffaċċjaw sfida ħarxa mill-Ukreni. Intant, ir-rapporti qabel morna għall-istampa indikaw li t-truppi Russi kienu anqas minn 30 kilometru ‘il bogħod miċ-ċentru ta’ Kiev
L-aħħar statistika qed turi li mietu ‘il fuq minn 200 Ukreni mindu l-qawwiet ta’ Putin invadew lill-Ukrajna fis-sigħat bikrin tal-Ħamis. Madankollu – u filwaqt li r-Russi mhumiex joħorġu ċifri ta’ suldati maqtula jew midruba – l-indikazzjonijiet huma li l-Armata ta’ Putin tilfet l-eluf tat-truppi, minbarra kwantità ta’ ajruplani, ħelikopters u vetturi tal-gwerra.
Fil-fatt, l-Ukrajna talbet biex il-Kumitat Internazzjonali tas-Salib l-Aħmar ineħħi l-katavri ta’ ‘eluf’ ta’ Russi li nqatlu s’issa fl-invażjoni u bil-għan li l-katavri jittieħdu lura lejn ir-Russja. Il-Viċi-Prim Ministru tal-Ukrajna, Iryna Vereshchuk, intant, appellat biex il-Kumitat Internazzjonali jimpenja ruħu minnufih għat-tneħħija tal-katavri tar-Russi bħala ‘ħtieġa umanitarja’.
