Il-Gvern tal-Ukrajna qal li l-aħħar bumbardamenti bil-missili fuq Kiev huma ‘simili’ għall-meta l-kapitali Ukrena, fl-1941, kienet attakkata mill-qawwiet tal-eksdittatur Nażista Adolf Hitler waqt it-Tieni Gwerra Dinjija.
Dan sostnieh il-Ministru Ukren għall-Affarijiet Barranin Dmytro Kuleba li ma rreferiex għat-telf ta’ ħajja potenzjali b’kaġun tal-aħħar bumbardamenti mill-Armata ta’ Vladimir Putin.
Kuleba ukoll baqa’ isostni l-messaġġ ta’ sfida kontinwa minn Kiev u fakkar ‘li bħalma l-Ukrajna kienet għelbet lin-Nażiżmu, hekk ukoll se toħroġ rebbieħa fuq l-aggressuri ta’ Moska’. Hu appella wkoll ‘biex id-dinja taqta’ kull irbit mar-Russja ta’ Putin u b’mod li dan il-pajjiż jibqa’ iżolat għalih waħdu’.
Dan meta l-mexxejja tal-Istati tan-NATO qed jikkunsidraw il-passi li jmiss kontra l-Kremlin ta’ Moska, fost pressjoni akbar biex iżidu mas-sanzjonijiet li tħabbru diġà fil-konfront tar-Russja.
