Liverpool għamluha għall-kwartifinali tal-UEFA Champions League minkejja t-telfa ta’ 1-0 kontra Inter. Liverpool viċin li jiftħu l-iskor fil-31minuta meta minn cross ta’ Trent Alexander Arnold id-daqqa ta’ ras ta’ Joel Matip ħabtet mal-lasta. Liverpool għal darb’oħra resqu viċin il-gowl meta fil-51 minuta l-goalkeeper Samir Handanovic naqas milli jtajjar tajjeb, b’ Mohammed Salah jara l-konklużjoni tiegħu taħbat mal-lasta. Madanakollu, kontra x-xejra tal-logħob, Inter marru fil-vantaġġ fil-61 minuta meta Lautaro Martinez approfitta minn żball fid-difiża ta’ Liverpool u b’xutt fir-rokna tax-xibka għeleb lil Alisson għal 1-0. Iżda Inter spiċċaw jilagħbu b’għaxar plejers minuta wara, meta Alexis Sanchez ġie muri t-tieni karta safra għal foul fuq Fabinho. Liverpool għal darb’oħra sfortunati meta fis-76 minuta minn cross ta’ Andrew Robertson, Mohammed Salah ra l-volley tiegħu jaħbat mal-lasta.
Wara d-draw ta’ 1-1 fl-ewwel leg, fil-partita ta’ ritorn fl-Allianz Arena Bayern Munich għelbu lil FC Salzburg bl-iskor ta’ 7-1, biex huma wkoll għamluha għall-kwartifinali. Huma fetħu l-iskor fit-12-il minuta meta Maximilian Woeber deher jiġbed il-flokk ta’ Robert Lewandowski fil-kaxxa bir-referee jordna penalty, li kien mogħti u skorjat mill-istess Robert Lewandowski. Għaxar minuti wara reġa’ kien Woeber li din id-darba waqqa’ lil Lewandowski fil-kaxxa għat-tieni penalty għat-tim Ġermaniż, b’Lewandowski ma żbaljax għal 2-0. Il-Pollakk għaqqad il-hat-trick personali minuta wara, meta qabbeż il-ballun minn fuq il-goalkeeper Philipp Kohn u xeħet ġewwa għal 3-0.
Ir-raba’ gowl għal Bayern wasal fil-31 minuta meta minn pass ta’ Kinsley Coman, kien Serge Gnabry li xeħet fix-xibka. Bayern Munich żieda l-ħames gowl fl-54 minuta permezz ta’ Thomas Muller fit-tieni taqsima, qabel fis-70 minuta Maritis Kjaergaard skorja gowl ta’ konsolazzjoni għal Salzburg. Bayern Munich komplew ikabbru l-iskor fit-83 minuta b’gowl ieħor ta’ Thomas Muller, biex fil-85 minuta niżżel ismu ukoll fost l-iskorers Leroy Sane.
UEFA CHAMPIONS LEAGUE
Illum: Liverpool v Inter 0-1 (2-1), B.Munich v FC Salzburg 7-1 (8-2) Għada: Man City v Sporting, R.Madrid v PSG
