Il-Pulizija akkużat raġel ta’ 34 sena residenti Tas-Sliema wara li allegatament iffilmja lilu nnifsu li kellu x’jaqsam sesswali ma’ tfajla ta’ 15-il sena f’aktar minn okkażjoni waħda u mingħajr ma hi kienet taf. L-Ispettur Joseph Busuttil ressaq lill-akkużat imwieled fil-Peru quddiem il-maġistrat Nadine Lia.
Spjega lill-Qorti li l-Viċi Squad tal-Pulizija kienet irċeviet ilment kriminali mingħand missier it-tifla, wara li l-akkużat kien bagħat filmat ta’ wieħed mill-laqgħat sesswali tagħhom lit-tifla. Hekk kif missierha sar jaf, huwa kien ressaq l-ilment kriminali u għadda l-filmati lill-pulizija, qal l-ispettur, li żied li t-tifla ma kinitx taf bil-fatt li kienet qed tiġi ffilmjata.
L-Avukati Herman Mula u Michele Cardinale, li dehru għall-imputat, wieġbu li l-klijent tagħhom ta’ mhux ħati f’ismu. Mula informa lill-qorti li d-difiża ma kinitx qed titlob il-libertà proviżorja f’dan l-istadju, iżda talbet lill-prosekuzzjoni biex issejjaħ ix-xhieda tagħha mingħajr dewmien.
Il-Qorti laqgħet talba tal-prosekuzzjoni għal ordni ta’ protezzjoni favur it-tifla. Id-difiża talbet lill-qorti timponi projbizzjoni fuq il-pubblikazzjoni tal-isem tal-akkużat, u qalet li inkella kien hemm ċans li dan jista’ jwassal għall-identifikazzjoni tal-vittma.
L-Ispettur Busuttil ma oġġezzjonax għall-projbizzjoni, u semma l-istess raġuni. Il-qorti, wara li kkonsultat mal-liġi, laqgħet it-talba għal projbizzjoni li tibqa’ fis-seħħ għal kemm idumu l-proċeduri kriminali kontra l-akkużat. L-Avukat Roberta Bonello dehret parte civile għat-tifla..
