Relazzjoni ma’ mara miżżewġa wasslet biex il-vann tal-maħbub tagħha jingħata n-nar, allegatament mir-raġel tal-mara. Dan ħareġ hekk kif l-Ispettur Jeffrey Scicluna ressaq il-qorti lil raġel ta’ 45 sena mill-Fgura taħt arrest quddiem il-maġistrat Nadine Lia, fejn akkużah b’ħruq.
Ir-raġel, li jsewwi t-tyers u jaħdem bħala self-employed, ġie mixli li ta n-nar lil vann ipparkjat fi Triq Tumas Fenech f’Birkirkara. L-inċident seħħ fit-13 ta’ Jannar ta’ din is-sena. Scicluna spjega li investigazzjonijiet mill-Arsons Unit tal-pulizija, kienu waslu f’raġel bħala suspettat wara li għamel kontrolli fuq number plate reġistrata taħt ismu li kienet inlemħet fuq il-post.
Il-vann tiegħu kien jaqbel ukoll ma’ deskrizzjoni dettaljata tal-karozza tal-ħruġ, li kienet ingħatat il-pulizija. L-akkużat kien ġie arrestat it-Tlieta waranofsinhar u kien ammetta l-involviment tiegħu fil-ħruq waqt l-interrogazzjoni tiegħu, li matulha kien assistit mill-avukat tiegħu.
Ir-raġel kien qal lill-pulizija li l-vittma, John Paul Grima, kien f’relazzjoni sesswali ma’ martu u li wara li ħaseb kif jindirizza din il-problema, iddeċieda li jagħti n-nar lill-vann tiegħu. Qabel staqsietu x’kien se jwieġeb għall-akkużi, il-Qorti tat l-opportunità lill-akkużat biex jikkonsulta mal-avukat tiegħu, Franco Debono.
Huwa wieġeb mhux ħati u talab il-ħelsien mill-arrest għall-klijent tiegħu. L-Ispettur Scicluna qal lill-Qorti li l-akkużat kien ikkopera bis-sħiħ u ħareġ stqarrija dettaljata. L-ispettur qal li ma oġġezzjonax għall-ħelsien mill-arrest sakemm ix-xhieda ċivili jkunu protetti.
Huwa informa lill-Qorti li Grima qal lill-pulizija li ma kellux idea min seta’ ta n-nar lill-vann tiegħu u li l-pulizija waslu għand l-akkużat permezz tal-investigazzjoni tagħhom. Hu ma semmax lir-raġel u fil-fatt semma’ nies oħra, qal l-ispettur, u żied li din l-evidenza kienet diġà ppreservata fl-atti tal-inkjesta maġisterjali. Id-difiża ma oġġezzjonatx għas-suġġeriment tal-prosekuzzjoni li tinħareġ ordni ta’ protezzjoni.
Il-maġistrat, wara li qies is-sottomissjonijiet tal-partijiet fuq il-libertà proviżorja u nnota li l-provi kollha kienu ġew ippreservati fl-inkjesta maġisterjali, qabel li l-akkużat jinħeles mill-arrest. Il-libertà proviżorja kienet garantita b’depożitu ta’ €1000 u garanzija personali ta’ €4000.
Ir-raġel ġie ordnat ukoll jiffirma fl-Għassa tal-Pulizija darbtejn fil-ġimgħa u josserva curfew. L-Avukat Lennox Vella, deher parte civile talab lill-qorti timponi projbizzjoni fuq il-pubblikazzjoni tal-ismijiet tal-partijiet kollha involuti, u sostna li ċ-ċirkostanzi tal-każ jixirqilhom. Terzi kienu ssemmew u dan jista’ jikkawża preġudizzju lill-klijent tiegħu, sostna l-avukat. Il-Qorti, iżda, ċaħdet it-talba għal projbizzjoni fuq il-pubblikazzjoni tal-ismijiet tal-akkużati.
