Raġel li b’leħen għoli beda jgħid lil dawk li kienu għaddejjin minn ħdejh li kien qed ibigħ il-kannabis f’Paceville ġie mixli wara li pulizija li kienet għaddej mill-inħawi fejn kien qed jagħmel patrol semgħet d-dikjarazzjoni tiegħu u arrestatu. L-Ispettur Brian Xuereb ressaq il-Qorti quddiem il-Maġistrat Victor Axiaq lil Daud Shiek Ahmed, residenti Birkirkara fuq akkużi ta’ pussess aggravat ta’ kannabis, ksur ta’ sentenza sospiża u reċidiva.
Mitlub jispjega kif seħħ l-arrest, l-Ispettur Xuereb qal lill-Qorti li fis-sigħat bikrin tas-27 ta’ Frar, Surġent tal-pulizija, li kien ta’ ronda ta’ billejl f’Paceville kien sema’ persuna tgħajjat lil min ikun għaddej “Trid ħaxixa. ?” fiż-żona tat-Taraġ ta’ Santa Rita.
L-uffiċjal tal-pulizija waqqaf lil din il-persuna, l-akkużat, u beda jfittixlu. Fil-but tiegħu nstabu żewġ pakketti suspettati kannabis. “L-ammonti kienu żgħar iżda ppakkjati b’mod li jissuġġerixxi li kienu maħsuba biex jinbiegħu,” spjega l-ispettur.
L-akkużat ta’ 27 sena, li qal lill-Qorti li kien mis-Somalja, wieġeb mhux ħati tal-akkużi. L-Avukat Charmaine Sherrett, maħtura avukat tal-għajnuna legali għall-akkużat, infurmat lill-qorti li f’dan l-istadju ma kinitx qed tintalab il-libertà proviżorja. Il-Qorti ordnat li l-akkużat jinżamm arrestat.
