Chris Cassar
Melita 1
Zejtun 3
Melita: R. Caruana, M. Debattista, M. Cachia, JP Attard, A. Attard, N. Cutajar, J. Galea, A. de Barros, J. Abela, H. Konno, A. Messina
Zejtun: C. Cassar, A. Abela, D. Agius, C. Borg, R. Sgaria Farias, C. Grech, CH da Silva Barbosa, CJ Degabriele, S. Tounkara, D. Xuereb, G. Azzopardi
Referee: Stefan Pace
Żejtun żammew posthom fin-naħa ta’ fuq tal-klassifika, meta wara li sofrew gowl kmieni, rnexxielhom jirkupraw biex idawwru r-riżultat favurihom u jegħlbu lil Melita 3-1. Din kienet it-tielet rebħa konsekuttiva għal Żejtun, u l-ħdax-il rebħa mill-bidu tal-istaġun.
Kienu Melita li fetħu l-iskor wara biss ħames minuti logħob b’xutt mill-isbaħ direttament minn freekick minn barra l-kaxxa ta’ Antoine Attard, li ħasad għal kollox lill-gowlkiper Cassar u lid-difiża ta’ Żejtun. Ir-reazzjoni ta’ Żejtun kienet waħda immedjata u għaxar minuti wara marru viċin li jiskurjaw permezz ta’ Da Silva Barbosa, meta x-xutt tiegħu minn freekick għadda ftit għoli.
Żejtun baqgħu jippressaw u fil-35 minuta laqtu l-lasti permezz ta’ Xuereb li ttanta xortieh minn tarf il-kaxxa. L-isforzi ta’ Żejtun ġew ippremjati fis-36 minuta, meta minn korner ta’ Da Silva Barbosa, Alan Abela għola fuq kulħadd biex kiseb il-gowl tad-draw b’daqqa ta’ ras.
Fil-61 minuta wasal it-tieni gowl għal Żejtun minn azzjoni veloċi maħduma bejn Tounkara u Sgaria Farias, li alternaw il-ballun bejniethom, biex finalment kien Samba Tounkara li sab ir-rokna tax-xibka b’xutt fil-baxx.
Żejtun għamluhom tlieta fil-65 minuta grazzi għal Agius li seraq ballun lid-difiża ta’ Melita qabel għadda lejn Renan Sgaria Farias, li dar faċilment ma’ żewġ difensuri avversarji u poġġa lil Żejtun fil-vantaġġ b’xutt angolat.
Melita setgħu daħlu fil-partita fit-78 minuta meta r-referee saffar għal fawl fil-kaxxa u ssenjala penalty favur Melita; iżda x-xutt ta’ Michael Cachia ġie salvat tajjeb ferm mill-gowlkiper Cassar.
Qrendi u Swieqi jserrħu rashom
Qrendi 1
Swieqi 1
Qrendi: L. Cauci, Y. Ito, S. Schembri, M. Gatt, I. Zammit, B. Sammut, J. Ogunnupe, A. Agius, S. Perdomo Esquivel, LJ Cassar, L. Portelli
Swieqi: JC Debattista, M. Gauci, J. Magri Overend, K. Sultana, J. Willy, JA Castano, AD Schmebri Wismayer, M. Vella, J. Scerri, M. Micallef, J. Azzopardi
Referee: Mehmet Oral
Il-partita ferm movimentata bejn Qrendi u Swieqi spiċċat fi draw ta’ 1-1, biex iż-żewġ timijiet serħu rashom matematikament u żammew posthom f’din id-diviżjoni. Id-90 minuta ma naqsu xejn mill-azzjoni, u ż-żewġ timijiet kellhom diversi ċansijiet ta’ skor fejn l-ammont ta’ gowls seta’ kien ferm akbar.
Qrendi fetħu l-iskor wara biss erba’ minuti logħob meta minn korner, Bydasser Sammut għola fuq kulħadd u xeħet fix-xibka b’daqqa ta’ ras. Swieqi kisbu d-draw fil-21 minuta b’gowl mill-isbaħ ta’ Johan Alberto Castano. L-azzjoni bdiet mingħand Magri Overend, li qassam fin-nofs lejn Castano, li b’xutt mill-ewwel u b’mossa akrobatika, għeleb lill-gowlkiper Cauchi. Swieqi kienu ferm viċin li jmorru fil-vantaġġ żewġ minuti wara meta x-xutt ta’ Scerri minn tarf il-kaxxa għadda jħakkek mal-mimduda.
Qrendi setgħu jerġgħu jmorru fil-vantaġġ fit-38 minuta meta r-referee saffar għal penalty għal fawl ta’ Azzopardi fuq Sammut fil-kaxxa ż-żgħira. Perdomo Esquivel ittanta xortieh mill-ħdax-il metru iżda x-xutt tiegħu ġie salvat mill-gowlkiper Debattista.
Fil-50 minuta, Qrendi reġgħu marru ferm viċin meta Zammit ħarab tajjeb fuq ix-xellug u qassam lejn Ogunnupe, li minn pożizzjoni ferm ideali ra d-daqqa ta’ ras tiegħu tgħaddi ftit barra.
