“Il-futur ta’ pajjiżna mhux għall-bejgħ! U l-ebda ħajja m’għandha qatt tkun mhedda.”
Kien dan il-messaġġ ewlieni waqt velja li saret minn Repubblika fil-Belt Valletta fit-53 xahar mill-qtil tal-ġurnalista Daphne Caruana Galizia.
Saret referenza b’mod speċjali għall-invażjoni fl-Ukrajna fejn intqal kif il-vittmi għandhom jingħataw garanzija li l-libertà u l-kwalità ta’ ħajja tagħhom m’għandha qatt tiġi mhedda.
Waqt il-velja, uħud qabblu l-qlubija tal-Ukreni ma’ Daphne Caruana Galizia hekk kif l-istess bħalha, qed jinqatlu għaliex qed jiġġieldu għall-pajjiż li tant iħobbu… fosthom membri tal-midja li nqatlu fl-aħħar jiem fl-eqqel ta’ dan il-ġlied.
Repubblika kompliet tgħid li f’pajjiżna għaddejjin ġlieda bejn it-tajjeb u l-ħażin… biċ-ċittadini Maltin qed jiżżefnu f’nofs dan kollu tant li qed jispiċċaw vittmi tal-ħażin.
Dawk preżenti saħqu kif il-biża’ tista’ żżommok priġunier, iżda t-tama tista’ teħilsek minn kull sitwazzjoni.
