Colin Schembri
KAMPJONAT MAPFRE MSV LIFE NISA
ARMS Depiro ………….. 67
Starlites Naxxar ……… 72
(13-14)(20-17)(16-17)(18-24)
ARMS Depiro: M. Caruana 10, Ni. Agius 3, J. Xerri 4, A. Mallia, J. Mallia, L. Duncan 4, No. Agius, C. Ciantar 13, N. Hili, N. Borg, D. Galea 2, K. Koshuta 31.
Starlites: M. Zammit Cordina 8, M. Riolo 11, M. Bonett 17, S. De Martino 14, K. Portelli, A. Simmons 20, S. Davies, C. Curmi 2.
Referees: Florentina Ciurariu, Fanni Fabok, Ivica Simic.
L-aħħar round tal-kampjonat Mapfre MSV Life tan-nisa fetaħ bir-rebħa ta’ Starlites Naxxar fuq ARMS Depiro biex komplew jaċċertaw posthom minn post mall-aħħar tlieta. Il-partita fetħet bl-ewwel żewġ baskets minn Amelia Simmons għal Starlites li kważi għamlet il-punti kollha tagħhom f’din is-sessjoni. Ir-risposta ta’ Depiro ġiet minn Claire Ciantar, Julia Xerri u Kelly Koshuta f’run ta’ 11-2 li tathom vantaġġ ta’ 11-6. Fit-tieni taqsima, Starlites kabbru l-vantaġġ wara trippla minn Steffi De Martino. Depiro wkoll kellhom trippla minn Nicole Agius u l-punti ta’ Ciantar u għamlu l-iskor indaqs 24-24. Għal darb’oħra Simmons poġġiet lil Starlites minn fuq iżda Depiro kellhom seba’ punti mingħajr risposta u fl-intervall kienu basket minn fuq 33-31.
Wara l-intervall, Depiro fetħu vantaġġ ta’ seba’ punti fejn bdew bi trippla ta’ Monique Caruana flimkien mal-punti ta’ Koshuta. Starlites ukoll kellhom trippla minn Mikela Riolo flimkien ma’ Bonett però trippla oħra ta’ Caruana kabbret il-vantaġġ ta’ Depiro għal 9 punti 49-40. Hawn Starlites kellhom run ta’ 8-0 bill-punti ta’ De Martino, Bonett u trippla ta’ Riolo għal skor ta’ 49-48. L-aħħar taqsima fetħet biż-żewġ timijiet iwieġbu lil xulxin bid-Depiro jibqgħu fuq quddiem wara trippla minn Caruana. Starlites kellhom run ta’ 9-2 wara trippli minn De Martino u Michela Zammit Cordina però basket ta’ Ciantar ħalla lil Depiro basket ‘l bogħod. Fl-aħħar minuta, De Martino kellha trippla oħra u minkejja li Depiro reġgħu naqqsu d-distakk permezz ta’ Danika Galea, puni finali minn Riolo taw ir-rebħa lil Starlites fuq skor ta’ 72-67.
Caffè Moak Luxol ……. 62
Hibernians …………….. 61
(15-9)(12-14)(13-19)(22-19)
Caffè Moak Luxol: L. Fenech Pace, V. Selvaggi, S. Pace 12, F. Camilleri, H. Galea, P. Marcal 22, A. Borg 3, P. Ellul 6, M. Camilleri, J. Diaby 19.
Hibernians: E. Farrugia, K. Conti, I. Agius, Y. Bonett 13, A. Van Vliet 8, J. Abela 8, C. Camilleri, K. Jenkins 25, N. Farrugia, K. Caruana 7, K. Fenech, J. Dabic.
Referees: Zvezdan Dobrosaviljevic, Kamil Dworniczak, Iounut Ciurariu.
Basket tal-Brażiljana Palmira Marcal fl-aħħar sekonda ta rebħa drammatika lil Caffè Moak Luxol. Il-partita kellha bidu bilanċjat bil-Hibs imorru 5-4 minn fuq wara trippla ta’ Kirsty Caruana. Luxol kellhom mument tajjeb bi break ta’ 8-0 bi trippli minn Antoinette Borg u Marcal u temmew l-ewwel sessjoni 15-9 minn fuq. Fit-tieni taqsima Luxol fetħu bil-punti ta’ Paula Ellul u Josephine Diaby. Hawn Hibs irkupraw u għamlu run ta’ 10-2 b’żewġ trippli ta’ Jasmine Abela u għamlu l-iskor indaqs 21-21. Sensiela ta’ punti konsekuttivi minn Diaby poġġew għal darb’oħra lil Luxol minn fuq u huma daħlu jistrieħu 27-23 minn fuq.
Fit-tielet taqsima bdew ġejjin il-punti ta’ Kenyotta Jenkins għal Hibs li sa’ dak il-ħin kellha partita kwieta. Sarah Pace wieġbet b’żewġ trippli għal Luxol però Hibs irnexxielhom jaqilbu r-riżultat b’aktar punti minn Jenkins u Ylenia Bonett li kellha trippla. Basket ta’ Marcal ippareġġja l-partita però Jenkins kisbet basket ieħor għal skor ta’ 42-40. L-aħħar taqsima kienet l-aktar waħda kumbattuta fejn il-vantaġġ beda jinbidel kontinwament. Luxol kellhom trippli minn Pace u Marcal fil-waqt li l-punti ta’ Hibs ġew biss minn Bonett u Jenkins. L-eċitament laħaq il-qofol tiegħhu fl-aħħar minuti tal-partita. Għal darbtejn, Diaby poġġiet lil Luxol punt minn fuq però fl-aħħar sekondi żewġ free-throws ta’ Bonett taw vantaġġ lil Hibs. Kien għad fadal 4 sekondi, u mill-end line il-ballun ta’ Borg wasal għand Marcal li nifdet id-difiża ta’ Luxol u għamlet il-basket tar-rebħa fost il-ferħ tal-partitarji u l-players sħabha hekk kif Luxol ħarġu rebbieħa 62-61.
