Tliet irġiel tressqu l-Qorti akkużati b’serq ta’ €150,000 fi flus kontanti u ġojjellerija minn appartament f’San Pawl il-Baħar, li daħlu fih fl-4 ta’ Marzu li għadda. Juanito Jimenez ta’ 28 sena mill-Ħamrun, Hagen Azzopardi ta’ 28 sena mill-Imsida u Lydon Abela ta’ 21 sena mill-Mosta, tressqu l-Qorti quddiem il-maġistrat Leonard Caruana, akkużati b’serq aggravat minn vjolenza numerika u valur għad-dannu tat-tliet inkwilini tal-appartament.
L-irġiel ġew akkużati wkoll b’konfoffa biex iwettqu serq u li laqgħu għandhom oġġetti misruqa. Jimenez waħdu kien akkużat aktar b’ħafna reati ta’ ħasil ta’ flus u li naqas milli josserva ħames settijiet ta’ kundizzjonijiet ta’ pleġġ imposti minn diversi qrati.
Azzopardi waħdu kien mixli wkoll li jumejn ilu seraq pistola mingħand sid il-liċenzjat, li ġarr l-arma tan-nar fil-pubbliku mingħajr il-liċenzja meħtieġa u li kiser il-kundizzjonijiet tal-bail. Jimenez u Abela ġew akkużati wkoll li saru reċidivi minħabba l-kundanni tagħhom fil-passat.
Il-maġistrat sema’ kif wieħed mill-akkużati, Abela, kien suspettat b’involviment peress li qabel kien f’relazzjoni ma’ bint il-vittma. Abela kien ġie arrestat ġimgħa ilu u lliberat fuq police bail biex isiru aktar investigazzjonijiet, iżda reġa’ ġie arrestat ilĦamis.
Intant CCTV minn proprjetà fil-qrib wasslu lill-pulizija biex jidentifikaw lill-akkużat l-ieħor. Il-Qorti semgħet ukoll kif Jimenez kien mar fil-kwartieri ġenerali tal-pulizija biex jirrapporta li kien qed jiġi segwit u beża għas-sigurtà tiegħu.
Waqt li għamel ir-rapport, spettur tal-pulizija nnota li kien liebes choker tad-deheb taż valur għoli u qallu biex iħallih hemm bħala parti mill-investigazzjoni tal-pulizija. Meta Jimenez mar lura ġimgħa wara jiġbor iċ-choker, li hu stmat li jiswa madwar €30,000, ġie arrestat fuq il-post.
L-irġiel wieġbu mhux ħatja u nżammu taħt arrest preventiv wara li l-Qorti ċaħdet it-talbiet tagħhom għall-ħelsien mill-arrest. Il-libertà proviżorja ġiet rifjutata minħabba l-gravità tal-akkużi u l-fatt li xhieda ċivili kienu għadhom iridu jixhdu.
Il-qorti talbet lill-prosekuzzjoni biex issejjaħ xhieda kemm jista’ jkun malajr. Ġiet imposta wkoll ordni ta’ ffriżar fuq l-assi kollha tal-akkużati fid-dawl tal-akkużi ta’ ħasil ta’ flus, minkejja oġġezzjonijiet mill-avukati difensuri, li kienu ssuġġerew li din tkun limitata għall-ammont allegatament misruq.
L-Ispetturi Joseph Mercieca u George Frendo mexxew il-prosekuzzjoni flimkien mal-avukat Sean Xerri de Caro mill-Uffiċċju tal-Avukat Ġenerali. L-avukati Franco Debono u Matthew Xuereb dehru għal Jimenez, filwaqt li Debono u l-avukat Marion Camilleri rrappreżentaw lil Azzopardi fil-proċeduri. Lydon Abela kien assistit mill-avukat Arthur Azzopardi.
