Raġel ta’ 33 sena minn Wied il-Għajn u mara ta’ 42 sena mill-Ħamrun ġew mixlija b’pussess aggravat ta’ kokaina u ħasil ta’ flus, wara li nhar il-Ħamis ġew arrestati f’Wied il-Għajn. L-arresti saru wara li l-pulizija kienet irċeviet tagħrif dwar kummerċ tad-droga ġewwa blokk ta’ appartamenti f’Marsaskala u assenjat persuni biex imorru fuq il-post u jagħmlu sorveljanza.
Huma tressqu b’mod separat, fejn Charmaine Bezzina u Ian Zammit dehru quddiem il-maġistrat Josette Demicoli. It-tnejn ġew akkużati li kienu fil-pussess ta’ kokaina f’ċirkustanzi li kienu jindikaw li ma kinitx biss għall-użu personali, l-pussess tagħha u li saru reċidivi.
L-Ispettur Alfredo Mangion, li kien qed imexxi l-prosekuzzjoni, qal lill-qorti li l-pulizija kienet irċeviet ‘tip off’ dwar it-traffikar tad-droga fil-post. Erba’ uffiċjali kienu avviċinaw lil Bezzina waqt li kienet fil-karozza tagħha wara li ħarġet mill-appartament.
Hija nstabet li kienet qed iġġorr tliet qratas trab abjad, suspettat li kien kokaina, b’100g oħra tas-sustanza nstabu ġewwa l-karozza tagħha. Zammit kien ukoll twaqqaf u mfittex minn uffiċjali li qed jimmonitorjaw il-blokk ta’ appartamenti u nstab li kien qed iġorr pakkett kokaina.
Ir-raġel qal lill-uffiċjali li kien kiseb id-droga minn appartament ġewwa l-blokk, fejn sostna li huwa s-sieħeb tal-kerrej. Iżda ma nstabet l-ebda droga meta l-pulizija fittxew il-proprjetà li indika u l-kerrejja, li qalet lill-pulizija li ma kellu ebda konnessjoni mar-raġel.
Aktar investigazzjonijiet irriżultaw li r-raġel kien jgħix f’appartament differenti, li wara tfittxija tiegħu nstabet 750g kokaina u xi €65,000 fi flus kontanti. Zammit waħdu kien mixli wkoll b’ħasil ta’ flus u li kiser żewġ ordnijiet ta’ kundizzjonijiet ta’ pleġġ.
Il-prosekuzzjoni talbet ordni ta’ ffriżar fuq l-assi tal-akkużat fiż-żewġ każijiet. Iż-żewġ akkużati wieġbu mhux ħatja tal-akkużi miġjuba kontrihom. L-Avukat Franco Debono li deher għal Zammit flimkien mal-avukat Marion Camilleri, talab il-ħelsien mill-arrest filwaqt li saħaq li m’hemmx xhieda ċivili stabbiliti biex jixhdu kontra l-klijent tiegħu.
Saħaq li x-xhieda tal-mara li saret it-tfittxija tad-dar tagħha, ma jkollha l-ebda importanza tal-każ peress li ma kinitx taf lill-akkużat. L-Ispettur Mangion oġġezzjona għat-talba filwaqt li nnota kif l-imputat ipprova jqarraq bil-pulizija billi involva terza persuna li ma kellha ebda rabta mal-każ.
l-Qorti, ippreseduta mill-maġistrat Josette Demicoli, ċaħdet it-talba tar-raġel għall-ħelsien mill-arrest, u ċċitaa r-riskju ta’ tbagħbis tal-provi. Il-Qorti iżda tat il-libertà proviżorja lil Bezzina, li ħelsetha mill-arrest kontra depożitu ta’ €1,000 u garanzija personali ta’ €9,000. Il-Qorti ordnat lill-mara tiffirma fl-Għassa tal-Pulizija, tliet darbiet fil-ġimgħa u tosserva curfew. Għal Bezzina dehru l-avukati David Gatt u Ishmael Psaila.
