Żagħżugħ, li twaqqaf mill-pulizija meta kien għaddej b’veloċità mill-pjazza ewlenija ta’ Raħal Ġdid b’karozza BMW irreġistrat f’isem terza persuna, inħeles minn akkuża ta’ serq ta’ vettura. Alan Felice, li llum għandu 28 sena minn Santa Luċija, kien ġiegħel lill-uffiċjali tal-RIU biex jintervjenu f’dik il-lejla ta’ Awwissu 2014 meta saq minn Pjazza De Paule b’veloċità eċċessiva.
Is-sewwieq żagħżugħ ġie mblukkat u saru tfittxiet fil-vettura BMW. Dan kien meta l-pulizija raw sigarett mimli droga, xi weraq imfarrak ġewwa kontenitur tal-plastik flimkien ma’ ‘crusher’, li kollha qajmu suspett ta’ pussess tal-kannabis.
Iż-żagħżugħ ġie arrestat u sussegwentement ġie mixli b’pussess ta’ ħaxix tal-kannabis, serq aggravat tal-vettura kif ukoll li sar reċediv. Huwa wieġeb mhux ħati u saħaq li d-droga li nstabet fil-pussess tiegħu kienet għall-użu personali tiegħu.
Huwa kien beda jagħmel użu mid-droga xahar qabel l-inċident u dakinhar filgħaxija meta mblukkat mill-pulizija, kien għadu kif xtara l-kannabis mill-Marsa. Rigward il-BMW, Felice l-ewwel qal lill-pulizija li kien ħa ċ-ċavetta tal-karozza minn mazz ċwievet li kellu zijuh fil-garaxx tal-panel beater tiegħu, u li ħareġ għal ftit biex jixtri x’jiekol.
Għalkemm ammetta li dak il-ħin kien qed isuq mingħajr liċenzja, l-akkużat ċaħad li kien qed isuq b’veloċità eċċessiva. Aktar tard, meta xehed fil-Qorti, l-akkużat qal li l-BMW fil-fatt kienet tiegħu iżda fil-ħin tal-inċident, it-trasferiment tagħha mingħand is-sid preċedenti kien għadu ma tlestiex.
Uffiċjal ta’ Transport Malta kkonferma li f’Marzu tal-2014, dik il-vettura kienet ġiet irreġistrata f’isem persuna oħra, iżda ġiet trasferita lill-akkużat f’Marzu tal-2015. Il-BMW sussegwentement ġiet trasferita lil parti terza. Iz-ziju tal-akkużat, panel beater b’passjoni għar-restawr tal-karozzi, xehed ukoll li n-neputi tiegħu kien ġab il-BMW għal xi tiswijiet meħtieġa.
Meta tat is-sentenza l-qorti, ippreseduta mill-maġistrat Doreen Clarke, osservat li d-droga li nstabet fil-pussess tal-akkużat kienet tammonta għal tliet grammi ħaxix tal-kannabis. Fid-dawl tal-emendi legali tas-sena l-oħra, il-pussess tad-droga taħt is-seba’ grammi ma kienx għadu meqjus bħala reat kriminali.
Billi f’materji kriminali kellha tapplika l-liġi li kienet aktar favorevoli għall-akkużat, din l-akkuża ma setgħetx tiġi segwita aktar. Dwar is-serq tal-vettura, il-Qorti osservat li l-allegat vittma kien xehed dwar il-qbil tiegħu mal-akkużat għat-trasferiment tal-BMW.
Saħansitra kien għadda l-log book tal-vettura u kulma kien fadal xi jsir kien it-trasferiment li eventwalment tlesta, qal is-sid preċedenti, li żied li ma kellu l-ebda pretensjoni fil-konfront tal-akkużat. Mill-provi rriżulta li dakinhar tal-inċident l-akkużat kien ingħata l-pussess u l-kontroll tal-vettura minn sidha reġistrat u għalhekk l-akkuża ta’ serq aggravat ma ġietx ippruvata.
Il-Qorti lanqas ma setgħet tiddikjara ruħha fuq l-akkuża ta’ reċidiva peress li l-Avukat Ġenerali kien naqas milli jiddikjara l-artikoli relattivi tal-liġi fil-lista ta’ dispożizzjonijiet tagħha li taħthom il-qorti kellha tagħti s-sentenza. Il-qorti għalhekk iddikjarat liberazzjoni. L-avukat Roberto Montalto kien l-avukat difensur.
A
