Jekk għadem ma ġbartx id-dokument tal-vot tiegħek, għandek ħin sa nofsillejl biex tagħmel dan.
Votanti rreġistrati biex jivvutaw f’Malta għandhom jiġbru l-vot tagħhom mill-Uffiċċju tal-Kummissjoni Elettorali fil-Kumpless tal-Għadd tal-Voti fin-Naxxar (Eks-Trade Fair Grounds, faċċata tal-grawnd tal-futbol) u mill-Uffiċċju tal-Karta tal-Identita’, 28A, Pjazza San Franġisk, ir-Rabat, Għawdex, għall-votanti reġistrati f’Għawdex.
Il-ġbir jista’ jsir sas-1.00pm jew inkella bejn it-3.00pm u nofsillejl. Kull persuna li trid tiġbor id-dokument għandha tmur personalment l-Uffiċċju tal-Kummissjoni Elettorali biex tieħu d-dokument mingħand il-Kummissjonarji Elettorali. Dawn il-votanti għandhom jieħdu magħhom il-Karta tal-Identita’. L-ebda dokument ieħor ma jista’ jkun aċċettat għal dan l-iskop.
Ta’ min jinnota illi min ma jkunx laħaq ġabar id-Dokument tal-Vot sa nofsillejl tal-lum jew ikun qed ibati mill-COVID-19 jew ikun fi kwarantina mandatorja relatata mal-COVID-19 u ma jkunx iddaħħal fil-lista li s-Supretendent tas-Saħħa Pubblika tgħaddi lill-Kummissjoni Elettorali sa nhar il-Ġimgħa, 25 ta’ Marzu 2022 fid-9.00 ta’ filgħaxija, ma jkunx jista’ jivvota.
