Fi stqarrija, il-Kummissjoni Elettorali qalet li, sas-2pm, ivvotaw madwar 40.45% ta’ dawk irreġistrati fl-aħħar Reġistru Elettorali. Dan ifisser li erba’ minn kull għaxar votanti f’pajjiżna diġà xeħtu l-vot tagħhom.
Madankollu, ċifri mhux uffiċjali li kiseb NET News juru li t-turnout reali hi ta’ madwar 45%, jiġifieri ftit anqas minn votant wieħed minn tnejn. Dan hekk kif il-Kummissjoni Elettorali kkwotat l-ammont ta’ votanti tal-lum mat-total tal-persuni inklużi fir-Reġistru Elettorali.
Iċ-ċifri mhux uffiċjali li kiseb NET News jinkludu l-votanti kollha – matul it-tliet sessjonijiet li nżammew mis-Sibt li għadda – inkluż in-nofs ta’ nhar tal-lum.
U filwaqt li l-Kummissjoni spjegat li mit-355,075 persuna rreġistrata, sas-2pm ivvotaw 143,628 persuna, iċ-ċifri ta’ dan l-istazzjon juru li fis-sessjonijiet kollha, ivvotaw ftit anqas minn 160,000 persuna.
| 2022 (ċifri maħruġa mill-Kummissjoni Elettorali) | |
| Distrett 1 | 43.85% |
| Distrett 2 | 38.26% |
| Distrett 3 | 38.87% |
| Distrett 4 | 42.81% |
| Distrett 5 | 40.23% |
| Distrett 6 | 39.32% |
| Distrett 7 | 39.05% |
| Distrett 8 | 42.55% |
| Distrett 9 | 42.47% |
| Distrett 10 | 41.47% |
| Distrett 11 | 39.28% |
| Distrett 12 | 37.72% |
| Distrett 13 | 40.50% |
| Total | 40.45% |
