It-tennista Pollakka Iga Swiatek telgħet fl-ewwel post tar-rankings tal-WTA wara li għelbet lill-Iżvizzera Viktorija Golubic fl-Open ta’ Miami. Hi għelbet lil Golubic b’punteġ ġta’ 6-2 6-0 biex saret l-ewwel tennista mwielda wara s-sena 2000 li laħqet il-quċċata tar-rankings tad-WTA jew tal-ATP. Ashleigh Barty li tinsab tokkupa l-ewwel post ħabbret b’sorpriża li se tirtira mit-tennis, biex b’hekk Swiatek se tkun qed toħdilha postha.
Barty kienet ilha fl-ewwel post għal 114-il ġimgħa, b’Swiatek issir l-ewwel Pollakka li tokkupa l-quċċata tar-rankings.
Swiatek issa tiltaqa’ kontra l-Amerikana Madison Brengle fir-round li jmiss, bit-tennisti rinomati Coco Gauff u Petra Kvitova wkoll jagħmluha għar-round li jmiss. Intant, l-eks numru wieħed Naomi Osaka għaddiet għar-round li jmiss wara walkover kontra Karolina Muchova. Muchova kellha tirtira wara sofriet injury, b’Osaka tegħleb lil Angelique Kerber u Astra Sharma biex waslet sat-tielet round tal-Open ta’ Miami. Issa tiltaqa’ kontra Alison Riske jew Ann Li għall-post fil-kwartifinali.
Intant, l-eks numru 5 tad-dinja Daniela Hantuchvoa qalet li t-tennisti qed jitilfu r-rispett lejn il-Brittanika Emma Raducanu, wara l-aħħar serje ta’ telfiet. Raducanu kienet megħluba fit-tieni round tal-Open ta’ Miami minn Katerina Siniakova fit-tieni round. Hantuchova qalet li Raducanu trid trabbi qoxra akbar wara s-suċċess impressjonanti li kisbet fl-2021, fejn rebħet il-Grand Slam tal-Istati Uniti. L-eks semifinalista tal-Open tal-Awstralja qalet li t-tennisti kollha jridu jilagħbu u jegħlbu lil Raducanu, li saret stilla internazzjonali wara s-suċċess tagħha fi New York.
Fl-istess Open ta’ Miami ir-Russa Vera Zvonareva kellha l-kliem “No War” miktuba fuq il-beritta li libset fil-logħba tagħha kontra Danielle Collins. Zvonareva hi fost il-ħafna atleti li qed iwasslu messaġġ ta’ paċi f’nofs il-kunflitt ta’ bejn ir-Russja u l-Ukrajna. Aktar kmieni dan ix-xaħar, il-kompatrijott Andrey Rublev kiteb ‘No War Please’ fuq il-camera fl-Open ta’ Dubai.
