Il-Malta Wheelchair Basketball Association qed tissokta bl-attivitajiet tagħha . Din id-darba l-għan ewlieni huwa għad debutt f’kompetizzjoni internazzjonali tal-wheelchair basketball. Selezzjoni Maltija mistennija tiddebutta fit-Tournament ta’ Kwalifikazzjoni tal-International Wheelchair Basketball Federation EuroCup 2022.
It-Tournament ta’ Kwalifikazzjoni se jsir f’Lille, Franza bejn il-21 u l-24 ta’ April. Fil-grupp Malta Wheelchair Basketball Association hemm LUC Lille Handibasket , Elan Chalon Basket-Fauteuil – Franza , Wheel Foxes – Armenja u Hubo Limburg United on Wheels – Belgju . Din hija l-ewwel darba li fi grupp ta’ kwalifikazzjoni tal-Federazzjoni Internazzjonali Wheelchair Basketball se jieħdu sehem timijiet minn Malta u Armenja.
