Is-sid ta’ Chelsea Roman Abramovich li jinsab fi proċess li jbiegħ liċ-Champions Ewropej qed juri sintomi li seta’ ġie vvelenat. Rapporti li ħerġin fl-Ingilterra u media oħra internazzjonali qed jgħidu li wiċċ il-biljunarrju qed isofri minn tqaxxir ta’ ġilda, l-aktar fil-wiċċ u spiċċa b’għajnejn ħomor
Abramovich u żewġ negozjaturi oħra għal paċi fl-Ukrajna qed jiġġieldu s-sintomi ta’ avvelenament suspettat wara li ħadu sehem f’taħditiet ta’ paċi bejn ir-Russja u l-Ukrajna. Ir-rapporti qed jgħidu li Abramovich spiċċa bi dmugħ kostanti f’għajenjh u jinsab ferm muġugħ.
Dan kollu wara li kollox jindika li huwa vittma ta’ avvelenament li seħħew waqt taħditiet ta’ paċi bejn ir-Russja u l-Ukrajna aktar kmieni dan ix-xahar. Is-sid ta’ Chelsea ta’ 55 sena kien involut f’negozjati inizjali bejn iż-żewġ pajjiżi, li ilhom fi gwerra minn meta Vladimir Putin ordna li t-truppi tiegħu jidħlu fl-Ukrajna fl-aħħar ta’ Frar.
Kelliem għal Abramovich ikkonferma li huwa kien qed jaħdem lejn “il-kisba ta’ soluzzjoni paċifika” u li r-rwol tiegħu fit-taħditiet ġie kkonfermat aktar tard mill-Kremlin. Omm l-oligarka, Irina, twieldet fl-Ukrajna u bintha, Sofia, ħarġet kontra Putin fuq il-midja soċjali għall-invażjoni tiegħu tal-pajjiż ġar.
F’rivelazzjoni xokkanti, ħareġ Abramovich u mill-inqas żewġ negozjaturi anzjani fuq in-naħa tal-Ukrajna kienu qed jirċievu avvelenament suspettat aktar kmieni f’Marzu wara li ltaqgħu fi Kyiv.
Skont il-Wall Street Journal, dawk milquta kienu qed isofru minn dmugħ bl-uġigħ u kostanti u spiċċaw b’għajnejn ħomor nar kif ukoll ġilda mqaxxra fuq wiċċhom u idejhom, għalkemm ħajjithom mhix fil-periklu. Ir-rapport iżid li l-attakk huwa ssuspettat li sar minn xi hard-liners f’Moska li riedu jfixklu t-taħditiet biex tintemm il-gwerra. Barra minn hekk, il-President Ukren Volodymyr Zelensky ma ġiex affettwat minkejja li ltaqa’ ma’ Abramovic.
Għadu mhux ċar x’ikkawża s-sintomi, li setgħu ġew attivati minn aġent kimiku jew bijoloġiku, jew forma ta ‘attakk ta’ radjazzjoni elettromanjetika. Infetħet investigazzjoni dwar l-inċident minn Christo Grozev u ddaħħal tim forensiku Ġermaniż biex jagħmel l-eżamijiet.
Madankollu, għadda wisq żmien bejn l-avvelenament inizjali u dawn it-testijiet, u għalhekk il-velenu suspettat ma setax jiġi skopert. Grozev ikkonkluda li l-attakk kien twissija aktar milli attentat biex jinqatlu n-negozjaturi. Abramovich – li ħa f’idejh fi Stamford Bridge fl-2003 – jingħad li vvjaġġa lejn u lura minn Moska, Lviv u postijiet oħra ta’ negozjati bħala parti mir-rwol tiegħu fit-taħditiet, li l-kelliem tiegħu kkonferma fit-28 ta’ Frar.
“Nista’ nikkonferma li Roman Abramovich ġie kkuntattjat min-naħa tal-Ukrajna għal appoġġ fil-kisba ta’ riżoluzzjoni paċifika, u li ilu jipprova jgħin minn dak iż-żmien,” tgħid stqarrija. Minkejja li ħa sehem f’taħdidiet ta’ paċi, Abramovich ġie sanzjonat mill-gvern Ingliż f’Marzu, li rriżulta fl-iffriżar tal-assi tiegħu fir-Renju Unit. Chelsea tħallew ikomplu bl-operazzjonijiet relatati mal-futbol u l-bejgħ tal-klabb qed jipproċedi b’lista ta’ xerrejja potenzjali.
