Kompliet il-vjolenza fix-Xatt tal-Punent meta fl-aħħar sigħat, it-truppi ta’ Iżrael qatlu talanqas żewġ Palestinjani fost sparatura li seħħet waqt rejd mill-istess Iżraeljani fl-inħawi ta’ Jenin.
Il-militar Iżraeljan qal li l-isparatura nqalgħet meta s-suldati teigħu daħlu fil-kamp tar-refuġjati ta’ Jenin biex jarrestaw xi persuni suspettati dwar sehem f’attakk qattiel li kien seħħ fil-bidu tal-ġimgħa f’Iżrael.
Il-Palestinjani inkwistjoni huma suspettati li għenu aggressur biex joqtol ħames persuni waqt l-isparatura tat-Tlieta f’subborg ta’ Tel Aviv.
Ir-rapporti minn Iżrael issa qalu li s-suldati li daħlu għas-suspettati fil-kamp ta’ Jenin rreaġew bl-isparar wara li spiċċaw attakkati minn grupp ta’ Palestinjani. Ir-rapporti referew għal diversi inċidenti waqt ir-rejd u li s-suldati qatlu liż-żewġ Palestinjani huma u jiddefendu ruħhom mill-attakki. Ingħad ukoll li fl-isparar indarbu talanqas 15-il persuna, b’uħud jinsabu f’qagħda kritika.
Ir-rejd inkwistjoni seħħ ftit tal-ħin wara li Iżraeljan fix-Xatt tal-Punent kien spiċċa aggredit u ferut minn Palestinjan armat b’sikkina u li, imbagħad, inqatel mill-qawwiet tas-sigurtà fl-inħawi.
B’kollox inqatlu total ta’ ħdax-il persuna b’riżultat ta’ tliet attakki li seħħew f’Iżrael matul l-aħħar ġimgħatejn.
Dan waqt li l-Prim Ministru Iżrealjan, Naftali Bennett, qed iwissi dwar mewġa ta’ terroriżmu mill-estremisti Palestinjani f’Iżrael u t-territorji tax-Xatt tal-Punent ikkontrollati mill-Iżraeljani.
