Chris Cassar
NAXXAR L. …………….. 1
MARSAXLOKK ……….. 3
Naxxar L: O. Borg, E. Cerqueira Farias, J. Debono, G. Poncet, R. Cassar, J. Ellul, D. Bonnici, M. Fenech, A. Galea, S. Meilak, D. Kassekar.
Marsaxlokk: F. Tabone, G. Barone, J. Gill, M. Del Negro, C. Camilleri, X. Cappellino, W. Serrano, P. Xuereb, E. Vella, P.P. Sammut, N. Micallef.
Referee: Fyodor Zammit
Marsaxlokk rebħu l-konfront dirett kontra Naxxar Lions biex issa jinsabu pass ‘l bogħod mill-promozzjoni għall-kampjonat Premier fejn issa jonqoshom biss rebħa fl-aħħar logħba kontra Vittoriosa biex jaċċertaw mit-tieni post wara Pembroke u ritorn fl-ogħla diviżjoni tal-futbol Malti.
Marsaxlokk fetħu l-iskor b’azzjoni mill-isbaħ wara seba’ minuti logħob b’Camilleri jagħti pass preċiż lejn Neil Micallef li minn quddiem Omar Borg ma żbaljax b’xutt fil-baxx. Wara dan il-gowl Marsaxlokk ikkontrollaw il-logħba mingħajr wisq problemi iżda iktar ma beda għaddej il-ħin iktar Naxxar bdew jikbru fil-kunfidenza.
Fl-aħħar fażi tal-ewwel taqsima Naxxar ħadu għal kollox l-inizjattiva anki jekk il-goalkeeper Xlukkajr qatt ma kien impenjat. Fil-45 minuta Naxxar kisbu l-gowl tad-draw b’azzjoni tajba ta’ Cerqueira Farias li bidel il-ballun ma’ Joel Ellul u għeleb lil Tabone b’xutt fil-baxx minn tarf il-kaxxa.
Fil-bidu tat-tieni taqsima Naxxar bdew tajjeb u kellhom opportunita’ f’saqajn Jurgen Debono li falla minn qagħda tajba. Minn hawn reġgħu kienu Marsaxlokk li ħadu l-inizjattiva u żiedu l-pressjoni fuq id-difiża ta’ Naxxar li minn naħa tagħhom kienu perikolużi b’kontrattakk ta’ Cassar li kellu x-xutt salvat minn Tabone.
Fis-77 minuta Marsaxlokk marru mill-ġdid fil-vantaġġ meta s-sostitut Casers baqa’ jiddefendi tajjeb il-ballun u b’semi rovexxata sab ix-xibka. Tliet minuti wara kross preċiż ta’ Neil Micallef u daqqa ta’ ras stupenda ta’ Xuan Cappellino li prattikament poġġa’ lix-Xlukkajri fil-kampjonat Premier.
