Rapporti fil-media internazzjonali qed jindikaw li l-coach ta’ Ajax Erik ten Hag mistenni jinħatar coach ta’ Man Utd fi tmiem l-istaġun. Erik ten Hag kien wieħed mill-favoriti li jieħu post Ole Gunner Solskjaer meta tkeċċa f’Novembru li għadda, b’Man Utd jagħżlu li jaħtru lil Ralph Rangnick b’kuntratt temporanju sa tmiem l-istaġun.
Jidher li Ten Hag kellu intervista’ mill-bord tad-diretturi u mpressjonhom mhux ftit biex jieħu f’idejh it-tmexxija tal-club. Fost il-coaches li kienu fuq il-lista tal-club Ingliż kien hemm l-Arġentin Mauricio Pochettino, kif ukoll l-Ispanjoli Luis Enrique u Julien Lopetegui.
Man Utd jinsabu fis-7 post tal-klassifika b’51 punt fit-taqtiegħa tagħhom li jiksbu post mal-ewwel erba’ u jikkwalifikaw għall-UEFA Champions League.
Ten Hag ħa f’idejh it-tmexxija tat-tim ta’ Ajax fl-2017 fejn bena mill-ġdid skwadra ta’ suċċess fejn wassal lil Ajax sas-semifinali tal-UEFA Champions League fl-2019, fejn kienu eliminati minn Tottenham fl-aħħar sekondi tal-partita.
