Fil-Ġermanja Barcelona kienu miżmuma fi draw ta’ 1-1 minn Eintracht Frankfurt f’partita bilanċjata bejn iż-żewġ timijiet. Eintracht Frankfurt marru fil-vantaġġ fit-48 minuta meta d-difiża ta’ Barelona naqqset milli tbiegħed il-periklu, kien Ansgar Knauff li b’xutt minn tarf il-kaxxa għeleb lil Andre Ter Stegen għal 1-0. Minkejja l-pressjoni ta’ Frankfurt, Barcelona kisbu l-gowl tad-draw fis-66 minuta meta minn azzjoni ta’ Frenkie de Jong kien Ferran Torres li xeħet fix-xibka u kkonkluda azzjoni mill-isbaħ ta’ Barcelona.
Fir-Red Bull Arena draw ta’ 1-1 bejn RB Leipzig u Atalanta. Wara 17 il-minuta Atalanta marru fil-vantaġġ meta minn azzjoni ta’ Davide Zappacosta kien LUIS MURIEL li għeleb lil Peter Gulacsi għall-uniku gowl matul l-ewwel taqsima. Fit-tieni taqsima kibret il-pressjoni minn Leipzig li fis-56 minuta għal fawl ta’ Merih Demiral fuq Christopher Nkunku ingħataw penalty. Taħ Andre’ Silva iżda Juan Musso salva. Żewġ minuti wara l-iskor sar 1 – 1 meta minn kross ta’ Angelino DAVIDE ZAPPACOSTA ikkommetta auto-gowl meta għeleb lil Musso.
Bi Braga fuq l-offensiva fis-26 minuta gowl minn Andre Horta ma kienx ikkonvalidat bil-VAR minħabba azzjoni falluża fl-istess azzjoni. Madankollu fl-40 minuta Braga marru fil-vantaġġ b’ABEL RUIZ jgħeleb lil Alan McGregor minn azzjoni ta’ Iuri Medeiros . Gowl li kien biżżejjed għal Braga fl-unika rebħa mill-erba’ kwarti finali.
Wara li fit-tielet minuta ta’ ħin miżjud fl-ewwel taqsima, tkeċċa Aaron Cresswell għal West Ham, fit-52 minuta l-istess West Ham fetħu l-iskor. Gowl ta’ JARROD BOWEN li għeleb lil Anthony Lopes. Reazzjoni immedjata minn Lyon li fis-66 minuta kisbu l-gowl tad-draw wara li TANGUY NDOMBELE għeleb lil Alphonse Areola.
Mill-Conference League Bodoe kisbu rebħa drammatika fuq Roma bl-iskor ta’ 2-1 biex għal darb’oħra kisbu rebħa fuq it-tim ta’ Jose Mourinho. Kienu Roma li fetħu l-iskor meta minn pass ta’ Henrikh Mkhitaryan kien Lorenzo Pellegrini li bir-ras xeħet fix-xibka għal 1-0. Minkejja dan Bodoe kisbu d-draw fis-56 minuta meta kien Brice Wembangomo li approfitta minn żball ta’ Mkhitaryan u kkonkluda fix-xibka. Biex fid-89 minuta Bodoe skorjaw il-gowl tar-rebħa meta minn cross ta’ Armahl Pellegrino kien Hugo Vetlessen li tefa’ fix-xibka għal riżultat finali ta’ 2-1.
F’partita oħra Marseille kisbu rebħa ta’ 2-1 kontra PAOK b’Dimitri Payet jkun protagonista b’gowl mill-isbaħ. Gerson tefa’ lil Marseille fil-vantaġġ fit-13-il minuta qabel ma’ tmiem l-ewwel taqsima Dimitri Payet rdoppja b’xutt mill-isbaħ minn barra l-kaxxa fl-anglu tax-xibka. Fit-tieni taqsima PAOK naqqsu d-distakk fit-48 minuta permezz ta’ Omar El Kaddouri għal riżultat finali ta’ 2-1.
UEFA EUROPA LEAGUE
Kwartifinali Illum: Leipzig v Atalanta 1-1, E.Frankfurt v Barcelona 1-1, Braga v Rangers 1-0, West Ham v Lyon 1-1
UEFA CONFERENCE LEAGUE
Kwartifinali: Feyenoord v S.Prague 3-3, Bodoe v Roma 2-1, Leicester v PSV 0-0, Marseille v PAOK 2-1
