L-Assemblea Ġenerali tan-Nazzjonijiet Uniti għadha kemm ivvutat biex tissospendi lir-Russja mill-Kunsill tad-Drittijiet Umani tal-istess NU, bħala konsegwenza oħra tal-gwerra bla sens li għaddejja bħalissa fl-Ukrajna.
Is-sospensjoni tar-Russja kienet ikkonfermata waqt sessjoni tal-Assemblea fi New York. Dan l-iżvilupp kien inevitabbli wara l-ħafna allegazzjonijiet dwar reati tal-gwerra mit-truppi tal-Kremlin fl-Ukrajna.
Qabel il-vot deċiżiv, l-Ambaxxatur Ukren għan-NU, Sergiy Kyslytsya, akkuża lir-Russja dwar ‘abbużi tad-drittijiet umani fuq livell terribbli’ waqt li għamel enfasi fuq il-qtil ta’ għexieren ta’ ċivili mill-qawwiet ta’ Vladimir Putin fil-belt Ukrena ta’ Bucha u l-madwar.
Sadanittant, ir-Rappreżentant Russu għall-Assemblea, Gennady Kuzmin, ikkundanna l-vot waqt li xi pajjiżi, fosthom il-Korea ta’ Fuq u s-Sirja, appoġġjaw lir-reġim ta’ Moska.
Issa hu konfermat li 93 pajjiż ivvutaw għas-sospensjoni tar-Russja. b’24 jivvutaw kontra u bi 58 oħra jastjenu.
Intant, l-Ukrajna esprimiet sodisfazzjon li l-maġġoranza tal-pajjiżi tad-dinja qed jużaw il-voti internazzjonali biex juru l-għadab u stmerrija għad-delitti kontra ċ-ċivili li qegħdin jidhru bħala parti mill-aġenda tal-Kremlin waqt l-invażjoni tal-artijiet Ukreni.
