Żagħżugħ ta’ 15-il sena qiegħed isofri minn ġrieħi serji u jinsab fil-periklu tal-mewt wara inċident li seħħ f’Għajnsielem, Għawdex. L-inċident seħħ għall-ħabta tas-7 tal-Ħamis filgħaxija.
Permezz ta’ stqarrija l-pulizija qalu li l-investigazzjoni turi li t-tifel kien qed isuq rota qalb l-għelieqi fejn tilef il-kontroll u waqa’. It-tifel ittieħed minn qraba l-isptar Ġenerali ta’ Għawdex, iżda minħabba l-ġrieħi serji li sofra, mal-lejl ġie trasferit lejn l-Isptar Mater Dei b’ħelikopter.
Il-Maġistrat tal-Għassa Bridgitte Sultana ġiet nfurmata bil-każ u ħatret inkjesta filwaqt li l-investigazzjonijiet tal-Pulizija għadhom għaddejjin.
