Il-ġimgħa d-dieħla l-Qorti se tibda tisma’ s-sottomissjonijiet dwar it-talba riċenti tal-BirdLife għal mandat ta’ inibizzjoni, li fiha l-organizzazzjoni talbet għas-sospensjoni ta’ avviż legali li jippermetti l-kaċċa tal-gamiema fir-rebbiegħa. Il-każ ise jibda jinstema’ quddiem Madame Imħallef Audrey Demicoli nhar it-Tlieta li ġej fid-9.00 a.m. .
Ir-rikors għall-inġunzjoni, ippreżentata nhar it-Tnejn, jitlob lill-qrati jordnaw lill-Prim Ministru, lill-Ministru tal-Ambjent, lill-Ministru għal Għawdex kif ukoll lill-Wild Birds Regulation Unit (WBRU) biex jagħlqu immedjatament l-istaġun tal-kaċċa fir-rebbiegħa.
Fl-2017 ġie introdott moratorju fuq il-kaċċa għall-gamiema. Madankollu, il-kumitat konsultattiv tal-kaċċa, ORNIS, ix-xahar li għadda rrakkomanda li l-moratorju jitneħħa favur staġun tal-kaċċa fir-rebbiegħa bejn is-17 u t-30 ta’ April li kien jinkludi l-gamiema, apparti s-summien. .
F’konferenza stampa li saret barra l-qrati ftit wara li ġiet ippreżentata l-applikazzjoni għall-inġunzjoni, ir-rappreżentanti tal-BirdLife qalu li d-deċiżjoni li jinfetaħ l-istaġun tal-kaċċa fir-rebbiegħa għall-gamiema din is-sena kienet ir-riżultat ta’ “snin ta’ pressjoni mill-organizzazzjonijiet tal-kaċċa,” minkejja l-għasfur jiġi elenkat bħala speċi vulnerabbli.
