F’Anfield Liverpool għaddew għas-semi finali tal-UEFA Champions League meta temmew fi draw ta’ 3-3 kontra Benfica, b’riżultat aggregate ta’ 6-4. Liverpool marru fil-vantaġġ fil-21 minuta meta minn corner ta’ Kostantinos Tsimikas kien Ibrahima Konate li bir-ras xeħet fix-xibka għal 1-0. Għaxar minuti wara reazzjoni minn Benfica meta minn żball difensiv ta’ James Milner, kien Goncalo Ramos li approfitta u għeleb lil Alisson Becker għal 1-1.
Madanakollu fil-55 minuta Liverpool mill-ġdid fil-vantaġġ meta Diego Jota għadda tajjeb lejn Roberto Firmino li minn pożizzjoni favorevoli ma żbaljax għal 2-1. Liverpool skorjaw it-tielet gowl fil-65 minuta meta minn cross ta’ Tsimikas reġa’ kien il-Brażiljan Roberto Firmino li xeħet fix-xibka għal 3-1. Fit-74 minuta jasal it-tieni gowl ta’ Benfica permezz ta’ Roman Yaremchuk, qabel fit-82 minuta huma kisbu d-draw, meta minn pass ta’ Joao Mario, kien Darwin Nunez li għeleb lil Alisson għal 3-3. Fis-semi finali Liverpool issa jiltaqgħu kontra l-Ispanjoli ta’ Unai Emery, Villarreal, bl-ewwel leg mistenni jintlagħab f’Anfield.
Fil-Wanda Metropolitano kien Man City li għamluha għas-semi finali meta temmew fi draw ta’ 0- 0 kontra Atletico Madrid. B’Man City jikkontrollaw l-ewwel taqsima, fit-tieni taqsima kien Atletico li ħarġu jfittxu l-gowl, fejn ikkontrollaw il-kumplament tal-partita. Minkejja dan huma naqqsu li jkollhom okkażżjonijiet ċari ta’ skor, bl-aħħar minuti tal-partita jispiċċaw b’sensiela ta’ fouls min-naħa tat-tim Spanjol. Fit-92 minuta tkeċċaw għalihom id-difensur Felipe wara daħla kerha fuq Phil Foden, bil-players taż-żewġ timijiet ikollhom ikunu separati wara argumenti jaħarqu b’rabta ma’ din l-azzjoni. Fl-aħħar mintua ċans tad-deheb għal Atletico Madrid meta Angel Correa sab ruħu wiċċ imb’wiċċ ma’ Ederson b’dan tal-aħħar isalva tajjeb. Fis-semi finali Man City jiltaqgħu kontra Real Madrid bl-ewwel leg mistenni jintlagħab fl-Etihad Stadium.
UEFA CHAMPIONS LEAGUE
Ilbieraħ: B.Munich v Villarreal 1-1(1-2), R.Madrid v Chelsea 2-3(5-4) Illum: A.Madrid v Man City 0-0 (0-1), Liverpool v Benfica 3-3 (6-4)
Semifinali: Liverpool v Villlarreal, Man City v Real Madrid
