Is-sitwazzjoni fil-belt Ukrena ta’ Mariupol qed tidher dejjem aktar iddisprata għall-aħħar difensuri Ukreni. Madankollu, ir-reżistenza lir-Russi ma waqfitx minkejja li l-Armata tal-Kremlin, issa, irnexxielha tiċċirkonda għal kollox lil din il-belt.
Minkejja l-indikazzjonijiet li Mariupol kapaċi taqa’ dalwaqt f’idejn ir-Russi, hu minnu wkoll li brigata tal-Armata Ukrena għadha qed tisfida lill-qawwiet ta’ Vladimir Putin mill-mini ta’ taħt impjant lokali għall-produzzjoni tal-azzar u li qed iservuhom bħala ‘l-aħħar fortizza’ f’din il-belt.
Il-ħtif ta’ Mariupol għandu jkollu importanza strateġika kbira għar-Russi peress li huma, imbagħad, ikunu jistgħu jfasslu rotta importanti għall-movimenti tat-truppi u munizzjon mir-Russja lejn il-penisola tal-Krimea ( fl-Ukrajna) li ilha taħt il-kontroll tar-Russi mill-2014.
