Mtarfa FC kisbu l-ewwel promozzjoni tagħhom għal BOV Challenge League meta fil-finali tal-playoffs huma għelbu lil Għargħur bl-iskor ta’ 4-1. Din hi l-ewwel promozzjoni għal Mtarfa FC sa minn meta twaqqaf il-club fl-2006. Mtarfa fetħu l-iskor fil-25 minuta meta minn pass ta’ Kurt Zammit kien Nestor Da Silva li xeħet wara Andrew Zammit għal 1-0.
Huma rdoppjaw fit-43 minuta meta minn pass ta’ Alejandro Brincat reġa’ kien il-Kolumbjan Nestor Da Silva li mill-viċin ma żbaljax għal 2-0. Madanakollu Għargħur naqqsu l-iskor minuta wara meta minn corner mil-lemin, id-difiża ta’ Mtarfa naqqset milli tbiegħed il-periklu, approfitta Nicholas Formosa li xeħet wara Caruana għal 2-1.
Mtarfa għamluhom tlieta fit-73 minuta meta Nestor Da Silva żmarka lil Alejandro Brincat li wiċċ imb wiċċ ma’ Andrew Zammit xeħet fix-xibka għal 3-1. Mtarfa skorjaw ir-raba’ gowl ħames minuti wara meta Nestor Da Silva għaqqad il-hat-trick personali mill-ħdax-il metru għal riżultat finali ta’ 4-1.
