Dan hu l-ewwel Ħadd il-Għid għal ħafna snin li qed ikun iċċelebrat taħt id-dell tal- gwerra ….Aspett li kien trattat mill-Papa Franġisku waqt il-Quddiesa tal-Għid tradizzjonali fi Pjazza San Pietru ta’ Ruma u li għaliha attendew aktar minn 50,000 ruħ.
Filwaqt li l-Vatikan ilu mill-bidu tal-gwerra jsegwi b’attenzjoni l-iżviluppi traġiċi fl-Ukrajna, il-Papa Franġisku ħeġġeġ biex il-mexxejja konċernati jisimgħu t-talba tan-nies għall-paċi fl-artijiet Ukreni.
U l-Kap tal-Kattoliċi – fl-aktar diskors ċar dwar is-sitwazzjoni fl-Ewropa – ikkritika bi kliem iebes lir-Russja talli qabbdet ‘din il-gwerra bla sens u krudili’.
Il-Papa Franġisku, sa mill-bidu tal-konflitt, enfasizza l-pożizzjoni tiegħu kontra l-gwerra — bħal meta, ġimgħat ilu, kien mar fl-Ambaxxata Russa għall-Vatikan biex jesprimi l-inkwiet tiegħu dwar l-invażjoni tal-Ukrajna mill-qawwiet Russi. B’hekk ukoll, il-Papa kien tbiegħed sew mill-protokoll diplomatiku bħala pass mill-aktar rari għal Kap tal-Vatikan.
Fid-diskors tallum, il-Papa qal li ‘il-popli ma jistgħux jemmnu għajnejhom huma u jaraw l-effetti ta’ din il-gwerra…gwerra li kompliet għaddejja anki waqt il-festi tal-Għid’. Hu kompla li l-Ewropa u d-dinja, fl-aħħar jiem osservaw wisq vjolenza u tixrid tad-demm b’kaġun tal-impatt tal-konflitt fl-Ukrajna.
Il-Papa Franġisku kompla jesprimi n-niket profond ‘għall-Ukreni ħutu li qed ikollhom jissakkru taħt l-art jew f’postijiet oħra ta’ kenn bil-ħsieb li jistkennu mill-bumbardamenti kontinwi fuq pajjiżhom.’.
Din kienet ukoll l-ewwel quddiesa ta’ Ħadd il-Għid għall-Papa li setgħu jattendu għaliha n-nies mill-2019 – u meta l-avveniment kellu jkun pospost għal snin konsekuttivi minħabba r-restrizzjonijiet tal-Covid-19.
