Korea ta’ Fuq
Il-Korea ta’ Fuq qalet li rnexxiet prova ta’ missila oħra li, fi kliem ir-reġim ta’ Pyongyang, għandha żżid sew il-kapaċitajiet nukleari tal-Istat komunista.
Fl-aħħar sigħat ħarġu r-ritratti ta’ Kim Jong-un, il-Mexxej Korean komunista u l-Ġenerali tiegħu huma u jiċċelebraw il-prova tal-missila. Dan meta l-esperti u l-osservaturi tal-Korea komunista jemmnu li r-reġim fi Pyongyang qed iħejji wkoll biex jipprova arma nukleari tat-tip ‘tactical nuke’ u li tintuża biss għal zoni ta’ battalji partikulari.
Il-Korea ta’ Fuq, bħalma rajna fl-aħħar ġimgħat, irrankat il-provi tal-missili minkejja li fl-2017 kienet waqfet milli tipprova l-materjal nukleari. Fl-istess ħin l-aħħar ritratti miġbudin mis-satellita qed jindikaw il-possibbiltà li l-Korea komunista qed tirristawra l-mini fejn, qabel, kienu jsiru t-testijiet nukleari u li kienu nqerdu ftit tas-snin ilu bħala ġest dipomatiku waqt proċess ta’avviċinament mal-Korea t’Isfel.
L-aħħar rapporti qalu wkoll li l-missila l-ġdida li għaddiet mill-prova għandha sinifikat partikulari għaliex tista’ ittejjeb bil-kbir il-kapaċitajiet tal-missili tal-Korea ta’ Fuq li jwasslu fuq distanzi kbar. L-istess missila qed titqies ukoll bħala mudell superjuri li jgħin għall-produzzjoni tat-tactical nukes mill-Korea komunista.
Ir-rapporti minn Pyongyang qalu wkoll li Kim Jong -un wassal l-istruzzjonijiet lill-awtoritajiet ikkonċernati biex jissaħħu d-difiża u l-kapaċitajiet nukleari tal-Korea ta’ Fuq.
Dan meta l-Korea t’Isfel, fl-aħħar sigħat, ikkonfermat li l-Korea ta’ Fuq sparat żewġ missili, x’aktarx bil-kapaċitajiet għal distanzi qosra, u li spiċċaw fil-baħar.
Min-naħa tagħha, l-Istati Uniti qalet li qed issegwi b’attenzjoni s-sitwazzjoni fil-Penisola Koreana.
L-esperti qalu li l-provi tal-missili minn Pyongyang kapaċi qed isiru wkoll bħala protesta kontra l-eżerċizzji konġunti għall-qawwiet Amerikani u tal-Korea t’Isfel li għandhom jibdew fi kwistjoni ta’ sigħat. Dan meta r-reġim fi Pyongyang kemm-il darba kkundanna dawn l-eżerċizzji bħala provi għall-gwerra.
