Il-qawwiet tar-Russja, fl-aħħar sigħat, fetħu bumbardament qalil fuq diversi bliet tal-Ukrajna, fosthom il-belt ta’ Lviv, lejn il-Punent tal-pajjiż u li sal-bieraħ kienet għadha ma ġarrbitx l-impatt sħiħ tal-gwerra li ilha għaddejja mill-24 ta’ Frar.
Il-kelliema għal Moska, intant, qalu li sparaw il-missili lejn numru ta’ faċilitajiet militari tal-Ukreni, iżda hu minnu li l-missili niżlu wkoll – mill-ġdid – fuq xi zoni residenzjali.
Filwaqt li l-awtoritajiet Ukreni kienu qed jikkalkulaw l-ammont potenzjali ta’ vittmi fi Lviv, l-uffiċjali lokali qalu li mietu talanqas seba’ persuni wara li erba’ missili tar-Russi laqtu xi faċilitajiet f’dik il-belt – flimkien ma’ service point tal-vetturi.
Sadanittant, kienu rappurtati anki numru ta’ splużjonijiet ġodda fil-belt kapitali ta’ Kiev fejn, sa ftit jiem ilu, il-ħajja dehret li kienet qed tirritorna, bil-mod, għan-normal.
Is-Sindku ta’ Lviv, Andriy Sadovyi, akkuża lir-Russja b’li qed timmira speċifikament għal ċivili Ukreni bħala parti minn pjan għal ġenoċidju. Dan fost indikazzjonijiet li kien hemm ukoll it-tfal fost il-mejtin u l-midruba mill-bumbardament fuq din il-belt.
Il-ġenoċidju jitqies bħala l-aktar reat serju kontra l-umanità, bil-liġi internazzjonali tiddefinixxi dan ir-reat bħala ‘esterminazzjoni ta’ grupp ta’ nies partikulari fuq livell ta’ massa’.
Min-naħa tiegħu, is-Sindku ta’ Lviv sostna li r-Russja qed taħseb biex teqred lill-Ukrajna bħala pajjiż u li l-Ukreni mgħandhomx għażla oħra ħlief li jkomplu jirreżistu biex isalvaw lill-għeżież flimkien mal-identità tagħhom bħala poplu. Andriy Sadovji, waqt il-kummenti lill-istampa tad-dinja, qal ukoll li ‘l-Armata Ukrena hi magħmulha minn 40 miljun element’ b’referenza għall-poplu sħiħ tal-Ukrajna.
