Minkejja t-theddid tar-Russi li ‘se joqtlu lill-ġellieda Ukreni kollha’ fil-belt ta’ Mariupol, l-aħħar truppi Ukreni fl-inħawi ( li fadlilhom biss ftit munizzjon) xorta, għadhom qed jiġġieldu kontra l-qawwiet tal-Kremlin li ilhom il-ġimgħat jippruvaw jaħtfu l-kontroll f’din il-belt tal-port importanti.
L-aħħar truppi Ukreni fl-inħawi huma determinati li jirreżistu sal-aħħar nifs wara li skada ż-żmien ta’ ultimatum mingħand ir-Russi biex iċedu,
Dan meta t-truppi tal-Kremlin, fl-aħħar sigħat, kienu qed jippjanaw biex jillimitaw kemm jistgħu l-aċċessi lejn Mariupol, fejn ma fadalx bini waħda sħiħa, u li ilha taħt assedju mill-ewwel jiem ta’ din il-gwerra.
L-Armata tar-Russja, fl-aħħar sigħat, ikkonċentrat ukoll l-attakki fuq il-belt ta’ Kharkiv, fit-Tramuntana tal-Ukrajna kif ukoll fuq il-belt ta’ Mykolaiv, viċin il-port ta’ Odessa fit-territorji Ukreni tan-nofsinar.
