Matthias Mizzi
GŻIRA UNITED…….0
SANTA LUCIA ………1
Gżira United: D. Zarkov, G. Bohrer, M. Cosic (R. Gauci 106’), L. Tabone, N. Muscat, Z. Scerri (R. Correa 115’), T. Kolega, Y. Messias, C. Gauci (J. Attard 106’), A. Pavic (N. Portelli 20’), J. De Assis
Santa Lucia: J. Haber, A. Prates, J. Pisani, N. Pulis, G. Conti, V. Plut (E. Camilleri 120’), A. Valpoort, L. Pretes, J. Zerafa (A. De Souza 94’), D. Xuereb, Y. Soares
Imwissija: G. Bohrer 16’, Y. Messias 21’, J. Zerafa 31’ , N. Muscat 42’, A. Prates 64’, G. Conti 72’, Z. Scerri 72’, C. Gauci 100’
Skorjaw: Y. Soares 103’
Referee: Emanuel Grech
Assistenti Referees: Roberto Vella & James Muscat
In-Nazzjon Plejer tal-Logħba: Jefferson De Assis(GŻR)
Ġurnata storika għal Santa Lucia hekk kif goal ta’ YOEL SOARES fil-103 minuta tefa’ lit-tim tiegħu fis-semifinali tal-IZIBET F.A. Trophy. F’partita bbilanċjata miż-żewġ naħat l-ebda tim ma kien kapaċi jiżblokka r-riżultat matul id-disgħin minuta tant li l-partita kellha tmur għall-ħin barrani.
Kienu Gżira United li ħolqu l-ewwel periklu hekk kif f’ħarba mill-aqwa ta’ Jefferson De Assis wara biss ħames minuti logħob, wiċċ imb’ wiċċ ma’ Justin Haber dan qassam lejn Yuri Messias iżda nqabad f’offside. Santa Lucia wieġbu tliet minuti wara b’xutt b’saħħtu ta’ Ayrton Valpoort. Man-nofsiegħa logħob it-tim immexxi minn Giovanni Tedesco marru viċin hekk kif xutt ta’ Luiz Pretes ġie mblokkat mill-goalkeeper Darijan Zarkov. L-istess Zarkov reġa’ kien strumentali żewġ minuti biss wara meta Nicholas Pulis ittanta xortih mill-bogħod b’xutt fl-anglu.
Fit-tieni taqsima Gżira ħarġu aħjar biex fis-46 minuta xutt perikoluż ta’ Yuri Messias għadda jħakkek mal-mimduda. Messias kompla jippressa biex kwarta wara tela’ tajjeb u xeħet kross lejn De Assis, bid-daqqa ta’ ras tal-Brażiljan spiċċat barra. Wara din l-azzjoni r-ritmu naqqas biż-żewġ timijiet beżgħana li jlaqtu l-gowl li jeliminawhom mit-tazza, sabiex fit-83 minuta xutt ta’ Toni Kolega minn tarf il-kaxxa ħoloq ftit periklu għal Haber. Billi l-iskor baqa’ ma nbidilx wara d-disgħin minuta, il-partita għaddiet għall-ħin barrani.
Mal-95 minuta De Assis reġa’ ħarab f’azzjoni simili għal dik fi ftuħ il-partita sakemm id-difiża ta’ Santa Lucia għarfet iddawwar f’corner il-kross lejn Messias. Kontra għal dak mistenni fil-103 minuta Santa Lucia fetħu l-iskor meta d-daqqa ta’ ras mill-viċin ta’ YOEL SOARES kienet wisq b’saħħitha għal Zarkov minn free-kick tas-sostitut Alan Da Silva Souza.
