Il-pulizija fl-Iżvezja, fl-aħħar sigħat, arrestaw għexieren ta’ persuni li kienu involuti fi ġlied mal-qawwiet tal-liġi u wara xeni ta’ vjolenza pjuttost rari għal dan il-pajjiż. L-inċidenti seħħew waqt li n-nies kienu qed jesprimu rabja għall-pjani ta’ grupp estremista tal-lemin biex jinħarqu l-kopji tal-Koran, li hu l-ktieb qaddis tal-Musulmani.
L-agħar irvellijiet seħħew fil-belt ta’Norrkoping fejn il-pulizija sparaw tiri ta’ twissija biex iferrxu lill-gruppi tad-dimostranti. Il-vjolenza seħħet wara sensiela ta’ rallies organizzati mill-politiku Żvediż Rasmus Paludan li għandu wkoll nisel Daniż.
Paludan qal li diġà ħaraq kopja tal-Koran u li qed jaħseb biex jirrepeti l-azzjoni mal-ewwel ċans li jkollu – b’dawn il-kummenti jnisslu rabja fost diversi komunitajiet fl-Iżvezja.
Il-Musulmani jqisu kwalunkwe disrispett lejn il-ktieb qaddis tal-Islam bħala insult kbir personali. L-Arabja Sawdija – fost l-aktar pajjiżi Musulmani prominenti — ħarġet tikkundanna l-abbuż tal-Koran mill-estremisti fl-Iżvezja u qalet li aġir bħal dan hu provokazzjoni minbarra li inċitament ta’ vjolenza kontra l-Musulmani.
Fl-aħħar sigħat ukoll, l-Iraq u l-Iran sejħu lill-ambaxxuturi Żvediżi rispettivi biex jesprimu rabja għal dak li seħħ f’Norrkoping.
L-awtoritajiet tal-pulizija Żvediża qalu li qatt qabel ma raw irvellijiet daqshekk vjolenti f’Norrkoping lejn il-lbiċ minn Stokkolma, bil-vjolenza bejn il-pulizija u d-dimostranti sseħħ ukoll fl-inħawi ta’ Linkoping, fil-viċinanzi.
Fl-aħħar jiem seħħew anki l-irvellijiet simili f’subborg ta’ Stokkolma kif ukoll fl-ibliet ta’ Malmo u Orebro.
Il-Pulizija Żvediża qalet li fil-vjolenza weġġgħu numru ta’ pulizija u xi membri tal-pubbliku u li ‘il fuq minn 200 kienu involuti fil-vjolenza. L-awtoritajiet Żvediżi jemmnu wkoll li l-irvellijiet kienu organizzati min-networks tal-gruppi kriminali u li wħud mill-individwi responsabbli huma magħrufin sew mal-pulizija.
