Neil Agius u Sue Abela kienu l-protagonisti fis-serata finali tal-iSportMalta Awards Għażliet Sportivi Nazzjonali. F’Ġunju li għadda Neil Agius kiser ir-rekord dinji għall-itwal għawma mingħajr assistenza li qatt saret, fejn irnexxielu jgħum distanza ta’ 125.6km minn Linosa f’Lampedusa sa Malta. L-isportiva tas-sena Sue Abela kellha diversi suċċessi fl-2021 fejn saret iċ-champion tal-Ewropa meta rebħet iċ-Champions Cup filwaqt li kisbet midalja tal-bronż fil-Masters fil-Kampjonati Mediterranji.
Jeremy Zammit rebaħ l-unur Żagħżugħ tas-Sena wara li temm fil-ħames post fil-Kampjonati Ewropej ta’ taħt l-20 sena. Zammit kellu riżultat pretiġħuż ieħor hekk kif temm fis-seba’ post fil-Kampjonati tad-Dinja ta’ taħt l-20 sena. Il-Weighlifter ta’ 16-il sena Tenishia Thornton rebħet l-unur Żagħżugħa tas-Sena fejn klassifika fis-sitt post fl-IWF World Ranking. Thornton għandha l-ogħla ranking fost l-atleti Maltin kollha filwaqt li rebħet midalja tal-bronż fil-Commonwealth Senior Championships.
It-tim nazzjonali Malti tal-Waterpolo ta’ taħt il-15-il sena rebħu l-unur tat-team tas-sena li temmew fl-ewwel post fi Grupp C fil-kwalifikazzjoni għal LEN Men’s European Championship. L-unur tal-kowċ tas-sena ntrebaħ mill-kowċ Anthony Farrugia li mexxa lill-istess team matul l-esperjenza tagħhom fil-Kampjonati li saru fil-Portugall, bit-tim Malti jtemm fit-13-il post wara li għeleb lil Franza fil-playoff. Hu mexxa wkoll it-timijiet nazzjonali tal-waterpolo ta’ taħt is-17-il sena tal-irġiel kif ukoll tan-nisa.
Bernard Vassallo rebaħ l-unur tal-uffiċjal tas-sena bl-uffiċjal tal-basketball jikkontroll erba’ partiti mill-Eurobasket tan-nisa fi Franza. Hu rtira wara li kkontrolla xejn inqas minn 496 partita uffiċjali kemm f’ Malta kif ukoll fl-Ewropa u nħatar bħala FIBA Referee Observer kif ukoll FIBA Commissioner. Neil Agius ħareġ rebbieħ ukoll fil-kategorija tal-People’s Choice Award, unur li ntagħżel mill-Eżekuttiv tal-Għaqda Ġurnalisti Sports.
L-unur tal-aħjar attivita’ Sportiva Internazzjonali organizzata f’Malta ingħata lil ASA Aquatic Malta Sports Association li organizza il-European Junior Artistic Swimming Championship f’Lulju tal-2021. L-unur tal-atleta femminili tal-iSpecial Olympics għas-sena 2021 ingħata lil Rebecca Dalli filwaqt li l-unur tal-atleta maskili ingħata lil Jake Gatt.
