Chris Cassar
PEMBROKE A. ……………………. 1
ŻEBBUĠ R. ……………………….. 1
Żebbuġ rebħu bil-penalties 5-3
Pembroke A: M. Grech, K. Farrugia, D. Sant, N. Pace Cocks, E. Ferreira, J. Suda, C. Zammit, J. Bajada, J. Bondin, S. Jankovic, W. Gomes.
Żebbuġ R: J. Azzopardi, S. Bugeja, T. Bartolo, Y. Tonna, A. Mizzi, M. Perez Jimenez, R. Vella, J. Sciberras, S. Miloskovic, G. Gesualdi, I. Misan
Referee: Andrea Sciriha
Il-kampjonat Challenge kellu jkun deċiż bl-għoti tal-penalties wara li sa 120 minuta fid-decider bejn Pembroke u Żebbuġ l-iskor kien ta’ 1-1. Wara l-għoti tal-penalties kienu Żebbuġ li ħarġu rebbieħa 5-3 biex kienu dikjarati champions.
Bidu tajjeb minn Pembroke li wara tmien minuti resqu qrib b’azzjoni tajba ta’ Weverton Gomes li ra x-xutt tiegħu jaħbat ma’ sieq il-lasta. Tliet minuti wara Pembroke fetħu l-iskor meta minn azzjoni kien Ferreira li xeħet fix-xibka mill-viċin.
Wara dan il-gowl kien hemm reazzjoni timida minn Żebbuġ li ma kienux perikolużi u fid-29 minuta kien Azzopardi li salva liż-Żebbuġin b’save mill-aqwa fuq xutt fil-baxx ta’ Ferreira.
Fit-tieni taqsima Żebbuġ ħadu iktar inizzjattiva iżda ma kienx hemm azzjonijiet taħt-il lasta. Fl-64 minuta Neil Pace Cocks impenja direttament minn freekick lill-goalkeeper Żebbuġi Azzopardi.
Fid-79 minuta Żebbuġ kisbu l-gowl tad-draw meta xutt fil-baxx minn tarf il-kaxxa tas-sotitut Shalon Diacono spiċċa fix-xibka. Ħames minuti wara ċans tad-deheb għal Żebbuġ li jdawwru r-riżultat meta Silveira da Silva avanza waħda iżda kien imċaħħad minn Grech.
Fil-ħin barrani l-logħba baqgħet bilanċjata u fil-111-il minuta Azzopardi wettaq save mill-aqwa fuq daqqa ta’ ras ta’ James Brincat. Tliet minuti wara Żebbuġ spiċċaw b’għaxar plejers meta Miloskovic dabbar it-tieni karta safra.
Fl-għoti tal-penalties Żebbuġ skorjaw il-penalties kollha b’dak deċiżiv ikun skorjat minn Gesualdi, filwaqt li fatali kien l-iżball ta’ Gomes fl-ewwel penalty ta’ Pembroke.
