Hemm bżonn tiġi indirizzata b’mod immedjat sitwazzjoni li tirrigwarda l-operazzjonijiet ta’ emerġenza fl-Ortopedija.
Fi stqarrija, ffirmata mill-Kelliem għas-Saħħa Stephen Spiteri, il-Partit Nazzjonalista nnota kif ħafna pazjenti qed isofru minn dewmien inaċċettabli meta l-kundizzjoni medika tagħhom titlob kirurġija urġenti.
Dan id-dewmien jista’ jwassal għal kumplikazzjonijiet fuq saħħet dawn l-individwi, li wħud minnhom huma anzjani u vulnerabbli. Dan qed iseħħ minħabba nuqqas ta’ operating tables, anestetisti u theater nurses, b’din sitwazzjoni trid tiġi evitata b’soluzzjonijiet evidenti.
Il-Partit Nazzjonalista ilu jisħaq fuq waiting lists u żmien eseġerat ta’ stennija fil-qasam ta’ kura u servizz fl-Isptar Meter Dei, li qed inaqqas il-kwalità u l-effiċjenza.
Il-pazjenti Maltin u Għawdxin u l-familjari tagħhom jistħoqilhom aħjar, temm jgħid il-Partit Nazzjonalista.
