Gowl fuq kull naħa fl-ewwel fażi tat-tieni taqsima flimkien ma għadd ta’ saves mill-isbaħ minn David DeGea li bihom żamm lil Manchester United fil-partita, kienu l-ingredjenti ewlenin fil-partita klassika f’Old Trafford. Riżultat li b’xi mod temm is-serje negattiva ta’ Manchester United liema riżultat ma kellu ebda effett fil-klassifika b’Manchester fis-sitt post b’55 punt u Chelsea komdi fit-tielet post b’66 punt. Dominju assolut minn Chelsea matul l-ewwel taqsima fejn iżda ġew imċaħħda milli jiftħu l-iskor b’għadd ta’ saves minn David DeGea. B’Chelsea fuq l-offensiva fit-30 minuta minn azzjoni ta’Ngolo Kante kien Havertz li sab lil DeGea jsalva .
L-istess għamel fuq it-tentattiv ta’ Timo Werner fit-32 minuta u mill-ġdid fuq Kai Havertz fis-37 minuta minn azzjoni ta’ Reece James. 0 – 0 sa tmiem l-ewwel taqsima. Fil-ftuħ tat-tieni taqsima minkejja li Manchester United kienu aktar fil-partita, fis-60 minuta minn azzjoni ta’ Havertz kien MARCOS ALONSO li għeleb lil DeGea. Reazzjoni immedjata minn Manchester United li żewġ minuti wara kisbu l-gowl tad-draw permezz ta’ CRISTIANO RONALDO li minn pass ta’ Nemanja Matic għeleb lil Edouard Mendy għal 1 – 1 . Riżultat li baqa’ l-istess sa tmiem il-partita.
PREMIER LEAGUE
Illum: Man Utd v Chelsea 1-1
