Wara nuqqas ta’ sentejn minħabba l-Pandemija, iż-żewġ kampjonat organizzati mill- Federazzjoni Maltija taċ-Ċikliżmu, din is-sena ser isiru fuq tliet tiġrijiet kull kampjonat. Team Greens ikkonfermaw il-forma tajba li għaddejjin minna ċ-ċiklisti ewlenin tagħhom meta rebħu l-ewwel tiġrija relatata mal-Kampjonat Nazzjonali tat-Time Trial. F’temp xi ftit imsaħħab, Etienne Bonello spiċċa l-ewwel fil-Kategorija Elite, filwaqt li Marie Claire Aquilina rebħet il-Kategorija riservata għan-Nisa’, liema tiġrijiet saru nhar il-Ħadd l-1 ta’ Mejju 2022 fil-Coastroad, Salina fuq distanza ta’ 20 km fuq erba’ dawriet.
Ic-champion preżenti tat-Time Trial, Etienne Bonello spiċċa l-ewwel fl-Elite meta temm it-tiġrija tiegħu f’ħin ta’ 29:57. Frazjoni ta’ 0.10 sekonda warajh daħal sieħbu Clive Ebejer, filwaqt li fit-tielet post spiċċa Mark Bonnici (Agones SFC (30:02). It-tiġrija tan-Nisa rriżultat f’waħda dominata minn ċiklisti tat-Team Greens, biċ-champion renjanti Marie Claire Aquilina tispiċċa fuq quddiem f’ħin ta’ 33:13. Ftit sekondi warajh daħlet Juleanne Vassallo (33:35) u Danica Bonello Spiteri (34:38).
Luke Borg ta’ The Cyclist rebaħ il-Kategorija Under 23 f’ħin ta’ 30:2. Fit-tieni post spiċċa Stefan Scerri ta’ Gozo CC (31:39). Ivan Zammit ta’ B’kara SJ rebaħ il-Kategorija Masters 40+ f’ħin ta’ 30:39. Warajh daħlu rispettivament żewġ ċiklisti tat-Team Greens, Nicholas Schembri (31:49) u Gordon Howe (32:18). Kevin Muscat ta’ Mosta minn naħa tiegħu rebaħ il-Kategorija Masters 50+ f’ħin ta’ 31:58. Hu kien segwit minn Enrico Bradamante ta’ Agones SFC (33:57) u Emmanuel Camilleri tal-Mosta (36:56).
Jacob Schembri ta’ Mosta rebaħ il-Kategorija tal-Juniors (30:08). Warajh daħlu Jorgen Reitalu ta’ Mosta (33:43) u Darren Sultana ta’ Gozo CC (34:43). Kai Azzopardi ta’ Agones SFC spiċċa l-ewwel fil-Katerorija tal-Under 16 fejn temm it-tliet laps tiegħu f’ħin ta’ 26:34.
Fi tmiem din it-tiġrijiet saru l-premjazzjonijiet tal-medalji minn John Zammit u Joe Bajada, President u Segretarju Ġenerali rispettivament tal-Federazzjoni Maltija taċ-Ċikliżmu.
It-tiġrija li jmiss ser tkun l-ewwel waħda mill-Kampjonat tar-Road f’San Martin, San Pawl il-Baħar nhar il-Ħadd it-22 ta’ Mejju 2022.
