Id-difensur ta’ Fgura United Lee Pisani rebaħ it-TGS Fair Play Award għall-ewwel tliet xhur tal-2022. Dan huwa l-ħames rebbieħ ta’ dan l-unur wara li l-Għaqda Ġurnalisti Sports u t-Together Gaming Solutions ġeddew il-kollaborazzjoni tagħhom. Lee Pisani kien involut f’inċident mal-player ta’ Mġarr Samuel Saldanha f’partita mill-BOV Challenge League bejn Fgura u Mġarr, fejn Pisani niżel fuq saqajna il-Brażiljan u weġġgħ tant li kellu jiddaħħal l-isptar.
Pisani, b’ġest mill-aktar ammirevoli kiteb kartolina bil-Portugiż għal Saldanha u għaddijilu fiż-żjara li għamillu fl-isptar. Il-preżentazzjoni tat-TGS Malta Fair Play Award saret fil-preżenza ta’ Andrea Critien mid-Dipartiment tal-Finanzi u r-Riżorsi Umani, u Benjamin Delsinger Direttur Maniġerjali ta’ Together Gaming Solutions. Charles Camenzuli kien preżenti f’isem il-Malta Fair Play Movement.
