Espert tal-forensika diġitali tal-Europol ta lill-qorti r-rapport tiegħu dwar ‘il fuq minn 20 apparat, flimkien mal-apparat innifsu, li kollha kienu nqabdu bħala parti mill-investigazzjoni tal-pulizija dwar Jamie Vella u George Degiorgio kif ukoll l-aħwa ta’ Maksar Robert u Adrian Agius.
Il-Maġistrat Caroline Farrugia Frendo ippresediet il-każ hekk kif kompliet il-kumpilazzjoni tal-provi fil-konfront tal-irġiel Robert Agius u Jamie Vella huma mixlija li pprovdew il-bomba li qatlet Daphne Caruana Galizia f’Ottubru 2017. Adrian Agius huwa mixli wkoll li kkummissjona l-qtil tal-avukat Carmel Chircop fl-2015.
Vella u George Degiorgio huma mixlija li esegwew il-qtil ta’ Chircop f’kumpless ta’ garaxxijiet f’Birkirkara. George Degiorgio bħalissa għaddej minn proċeduri separati, flimkien ma’ ħuh Alfred, għall-involviment tiegħu fil-qtil ta’ Caruana Galizia.
Fil-bidu tas-seduta xehed surġent tal-pulizija li informa lill-Qorti li kien inkarigat jiġbor data minn apparat li nstab waqt tfittxijiet f’residenza fil-Baħrija, karozza Mercedes, residenza oħra fil-Mellieħa u vettura oħra, Seat, is-sena l-oħra. Is-surġent kien ġie fdat ukoll biex iwassal l-oġġetti lill-uffiċċji tal-Europol f’The Hague, għall-estrazzjoni tad-dejta.
Huwa esebixxa r-rapport tiegħu u d-dokumenti ta’ sostenn. Ix-xhud ukoll iddepożita fiżikament l-apparati elettroniċi li kien eżamina, – aktar minn 20 finnumru- fil-qorti. L-espert tal-Europol Giuseppe Totaro wkoll xehed. Totaro, speċjalista anzjan fi ħdan it-tim forensiku diġitali fil-Europol kien inħatar biex iwettaq eżami forensiku u estrazzjoni tad-dejta mill-apparati.
Totaro kien xehed ukoll fl-2020, waqt il-kumpilazzjoni tal-provi kontra Yorgen Fenech, li huwa akkużat separatament dwar il-qtil tal-ġurnalista Daphne Caruana Galizia fl-2017. 15-il borża tal-plastik żgħira ssiġillata, li kien fihom l-apparat elettroniku, tpoġġew fuq mejda fl-awla.
Fuq talba tal-avukat tal-prosekuzzjoni George Camilleri, ix-xhud espert għadda l-oġġetti wieħed wieħed, u identifika l-kontenut tagħhom fil-qorti, li ġie nnutat kif xieraq mill-qorti. Robert Agius u Vince Muscat setgħu jidhru jiċċettjaw u jidħku fil-baċir hekk kif sar il-proċess impenjattiv ta’ dokumentazzjoni.
Totaro esebixxa hard drive ta’ ħames terabytes, u ta wkoll lill-qorti kopja identika li l-prosekuzzjoni ssuġġeriet li tiġi kklonata u mogħtija lill-partijiet. L-ebda xhieda oħra ma ġew imħarrka għas-seduta. Il-qorti bagħtet l-atti tal-każ lura lill-AĠ u ffissat l-aġġornament li jmiss f’Ġunju.
L-avukati Alfred Abela u Rene Darmanin huma avukati difensuri tal-aħwa Agius. Għal George Degiorgio qed jidher l-avukat William Cuschieri. L-Avukat George Camilleri qed jirrappreżenta lill-Avukat Ġenerali fil-proċeduri, filwaqt li s-Supretendent Keith Arnaud u l-Ispetturi Shawn Pawney u Wayne Camilleri qed imexxu l-prosekuzzjoni.
