L-awtoritajiet Ukreni qed jittamaw li jirnexxu l-aħħar tentattivi għall-evakwazzjoni ta’ ċivili li ilhom il-jiem maqbudin fil-kumpless industrijali ta’ Mariupol. Dan meta għadha għaddejja l-battalja deċiżiva bejn il-gruppi ta’ suldati Ukreni f’din il-faċilità u t-taqsimiet tal-Armata Russa li qed jokkupaw partijiet tas-sit u l-madwar.
Skont l-aħħar indikazzjonijiet fadal ‘il fuq minn 200 ċivili – fosthom xi għexieren ta’ tfal – fil-bunkers ta’ taħt il-faċilità li tipproduċi l-azzar. Intant,, l-awtoritajiet Ukreni huma ferm ansjużi li dawn iċ-ċivili jitwasslu lejn artijiet ‘il bogħod miz-zoni tal-gwerra.
Kelliema qrib il-President tal-Ukrajna, Volodymyr Zelensky, qalu li – laħqu nħarġu kważi 500 ċivili minn Mariupol mindu bdiet azzjoni tas-salvataġġ fiz-zona u li qed titmexxa min-Nazzjonijiet Uniti.
Madankollu, il-battalja għall-kontroll tal-kumpless industrijali – l-aħħar fortizza tar-reżistenza f’Mariupol – qed tidher li waslet f’fażi kritika, bid-difensuri fil-faċilità jagħmluha ċara li lesti li jiġġieldu sal-aħħar minkejja n-numri ferm superjuri tal-qawwiet Russi fl-inħawi.
Min-naħa tiegħu, il-President tar-Russja Vladimir Putin, qal li l-Ukrajna għandha toħroġ direttivi speċifiċi biex il-ġellieda tagħha fil-faċilità ta’ Mariupol ‘jaqbdu u jċedu l-armi minnufih’.
Madankollu, ftit hemm ċans li dan iseħħ meta Putin jinsab ansjuż li jikkonferma l-ewwel rebħa militari fuq ċerta skala mindu l-qawwiet tiegħu invadew l-Ukrajna.
Putin qed jittama li l-belt ta’ Mariupol taqa’ kollha kemm hi lit-truppi ta’ Moska qabel iċ-ċelebrazzjoni, nhar it-Tnejn, ta’ Jum ir-Rebħa fir-Russja – liema avveniment ifakkar it-trijonf tal-eks Unjoni Sovjetika komunista fuq il-Ġermanja Nażista matul it-Tieni Gwerra Dinjija.
Dan meta kwalunkwe suċċess militari ‘assolut’ tar-Russi f’Mariupol għandu jitqies bħala żvilupp simboliku għal Moska li, bħalissa, qed tħejji għall-akbar parata annwali tas-sena.
