Il-vittma huwa minn Marsaxlokk
Ħaddiem tal-Wasteserv miet traġikament wara inċident ikrah illi seħħ fil-bini tal-inċineratur tal-annimali fil-Marsa.
Il-vittma huwa Joseph Ellul illi kellu 38 sena u kien jgħix Marsaxlokk.
Il-każ seħħ dalgħodu għall-ħabta tad-9am, b’sorsi ta’ Net News jindikaw li l-ħaddiem inqabad minn xi magni. Għalkemm id-dettalji għadhom iridu jiġu konfermati.
Fil-post wasal mal-ewwel tim mediku b’ambulanza, kif ukoll diversi uffiċjali tal-Pulizija. Iżda sfortunatament, il-ħaddiem kien ċertifikat mejjet fil-post.
Hu mifhum li fis-sigħat li ġejjin, tim tal-Forensika se jkun qed jistabbilixxi d-dinamika ta’ kif seħħ l-inċidenti filwaqt li jisiru aktar testijiet fuq il-katavru tal-vittma.
Dwar il-każ għaddejja inkjesta mmexxija mill-Maġistrat Elaine Mercieca.
